WASHINGTON, MERKA, AFP.- Kuarentishete persona di estado di Minnesota, na nort di Merka, a keda akusá relashoná ku un programa di alivio covid na balor di 240 mion dòler, segun indikashon di outoridatnan djamars.
“E akusashonnan ta deskribí un kòmplòt pa hòrta fondonan públiko destiná pa kuido di muchanan den nesesidat”, segun indikashon di e direktor di FBI, Christopher Wray.
Departamento di Hustisia a bisa ku e akusadonan a desviá miónes di dòler di Programa Federal di Nutrishon Infantil pa yuda muchanan den nesesidat durante e pandemia di covid.
“E akusadonan a usa e plaka pa kumpra vehíkulonan luhoso, kasnan i propiedatnan komersial na Minnesota, Ohio i Kentucky i tambe na Kenia i Turkia”, segun indikashon di e departamento.
E akusadonan ta enfrentá un variedat di akusashon ku ta varia desde froude elektróniko te ku soborno di programanan federal i labamentu di plaka.
