Na luna di òktober 2017 nos a hasi nos promé Djasabra digital. E promé tabata 28 di òktober ku Sherwin Anita konosí komo Pincho. Di einan un mundu nobo a habri kaminda praktikamente tur djasabra tabatin e sekshon spesial Djasabra den korant EXTRA i alabes por wak e mesun kos pero ku video riba nos plataforma digital EXTRA su facebook extracuracao, Youtube i tambe nos website www.extra.cw.
Te ku fin di 2021 nos a produsí 186 programa. Kada un diferente i tin asta algun ku e mesun personanan ku nos a entrevista ku a bin bek ku un update di loke nan a hasi. Nos por menshoná Juliette Jansen ku tin parfalisisi ta den su ròl stul pero ku nada a strobe di hasi Skydiving i 3 aña despues el a bai sambuyá.
Nos a bai te Ulanda i a hasi entrevista ku minister plenipotensiario na Kas di Kòrsou i ku yunan di Kòrsou destakando i poniendo nòmber di Kòrsou den laira manera Solange Concincion ku su obranan.
Miéntras e programa a sigui krese den oudiensia, e petishonnan tambe tabata subi. I ora Covid a dal aden, nos hendenan a bira aun mas kreativo i ekspresivo. 2020 i 2021 ta e añanan ku no a falta ni un djasabra di produkshon, Nos a trese te den kas di nos hendenan, yunan di Kòrsou na Alemania, Merka i tambe na Ulanda den aktuashon i arte enpartikular. I nos ta sigui brinda e plataforma aki na tur ku ke hasi su mes konosí, ser un ehèmpel pa otronan, promové nan mes aun mas i semper bai ku informashonnan positivo i edukativo.
Awe nos tin e di dos parti ku nos ta reprodusí algun di e entrevistanan ku a hala hopi atenshon. I nos ke yama Danki na tur ku e sostené Djasabra i nos te sigui
25 yan 2020
Herman van Bergen
Cathedral of thorns/katedral di sumpiña
25 mion sumpiña pa konstrukshon di “Katedral di sumpiña”
Otro siman lo ta apertura ofisial di e katedral di sumpiña den kura di Lanthùis Bloemhof. Mas di 2,5 mion di sumpiña a keda usa pa a konstruí e katedral mahestuoso aki i ainda no ta kla. Aki nos ta papia di 5 aña i mei di trabou.
Herman a studia arte na akademia na Arnhem. E tabata pinta den prinsipio i a traha hopi akuarela pa kalènder di Kòrsou durante di 30 aña. Kòrsou ta asina bunita ku el a traha hopi pintura. Pero tambe e a traha eskultura i Herman ta interesá den e komunidat i a traha. Tambe el a studia antropologia na universidat di Nijmegen. Na 2016 Herman van Bergen a gana e premio Cola Debrot na Kòrsou.
Siña di algu ku ta kousa doló…
Di un forma chistoso Herman el a bisa di a yega riba e idea despues di a haña hopi flèt tayer…. pero enrealidat Herman ta artista visual. El a bisa su mente ta hopi okupá sosialmente. E ke ekspresá e manera ku hende ta trata mundu. “Nos tin hopi problema di no bon edukashon, no a yuda hende pober, tin masha poko hende ku hopi sèn. Ta sushando oséano i nos ta sushando tera enbes di stima esaki. Nos ke laga e hende mira ku e sumpiña ta bunita. Tur hende ta odia e sumpiña pasobra e ta kousa doló, kousa flèt tayer pero nos a kambia e kos. Nos a kambia odio den amor”, Herman a konta Djasabra.
Idea di 16 aña pasa a bira realidat….
Herman a yega di traha un kabes di Hesus di sumpiña i e korona tabata di plèstik. El a hasié pa enfatisá ku ta sushando tera ku plèstik. E kabes di Hesus ta hopi bunita pa mira kon el a keda traha. E kos malu a pone riba kabes di Hesus i e tin doló pero Herman ta pensa ku ta nos ta e doló di kabes i nos ta pensa tiki ku paraiso nos ta biba ariba. Mester trata tera bon, tuma tur kuminda for di tera, ounke awor por mira ku tin hopi hende a bai den e direkshon ei. Ya ta 16 aña pasa ku el a traha un makèt di e katedral. I e maneho di Bloemhof a bisé ku si e logra e finansa e lo por trahe einan. I den prinsipio niun hende por a keda ora el a kuminsá ku e konstrukshon di e katedral di sumpiña.
1 febr 2020
Pablo Walter a traha 59 aña den enseñansa komo maestro di skol
Respetá e mucha su ora liber despues di skol
“Mi ta masha realista, ku papiamentu SO bo no ta yega leu”
Pablo Walter a traha 59 aña den enseñansa, pasa su edat di penshun sigui traha den loke e tabata gusta esta guia nos hóbennan. Ku entusiasmo el a konta Djasabra su eksperensia i kon e ta mira enseñansa awe, kiko e ta kere por kambia i en partikular nos hóbennan. El a duna lès for di e muchanan di mas chikí na enseñansa di fundeshi, e tempu ei skol básiko i a yega te na duna guia na esnan ku tin di bai para dilanti di klas.
Ku papiamentu so, e no ta mir’é
Pablo ta un fiel usadó di papiamentu, el a skibi diferente komedia na papiamentu, el a skibi poesia na papiamentu i e tin hopi kantika entre otro di kor, komponé na papiamentu. E lenga di papiamentu ta den dje pero e ta realista. “Nos komunidat ta masha chikitu, kiko lo por hasi si a base di e papiamentu ei so bo ke bai dilanti. Mi no ta mir’é. Na universidat mi a mira algun studiante ku a bin i bo ta mira nan hopi dediká di skol di papiamentu i dado momentu nan a kai atras i sali for di e estudio pasobra nan no por a sigui. Mi ta bisa shonnan laga nos ta realista, ku e papiamentu so nos no ta logra nada. Nos ta chikitu i si nos no ke mantené nos mes den reino i ke bula afó, si e pueblo ke, i ku nos ke un enseñansa ku tin balor pa nos komunidat ku ta bini, si nos no ke sigui ku e ulandes, kua otro idioma sea ingles òf spañó òf asta awendia mandarein pasobra tin yen chines akinan, pero si mi ta bisa ku mester hasié ku dedikashon i no mitar mitar”, Pablo a enfatisá.
Mart/aprel
Lianne Newton (mama)
Melayne Newton (3 aña)
Konfia bo instinto; bo no sa kon fuerte bo ta te ora bo pasa aden
Ya ta un aña pasá ku e chikitin Melayne Newton, e dia ei ku ni sikiera 2 aña ainda a keda detektá ku leukemia. Un chikitin ku hopi spit, ku a bisa ku e ta bas den hospital CMC a keda kore rònt, papia, sa e kaminda presis unda e ta kana, sa kon habri porta i dirigí nos te na e departamento di mucha kaminda nos di Djasabra a sinta papia ku su mama Lianne Newton.
Leukemia ku kasi 2 aña….
Lianne ta konta nos ku un aña pasá Melayne a kai i ora el a lanta i a sigui diferente tèst. Despues di 2 siman di a dun’é diferente remedi pa doló i nada a sosodé, nan a bai dòkter di mucha pa einan hasi un tèst di sanger urgente. Den un ora a haña sa ku e “bloedplaatjes” di Melayne ta abou. Mester a bai hospital ku urgensia i di einan a tende e tin un forma di leukemia. Denter di 48 ora nan mester a bula pa Ulanda pa tratamentu di Melayne.
Ser fuerte….
Komo mama di un yu di kasi 2 aña Lianne por bisa lo siguiente na otro mayornan den e situashon aki. E ta bisa skucha bo instinto, konfia bo instinto i si bo haña ku bo mester di hasi otro kos ku no ta e forma stándar i si bo sinti ku bo tin di lucha pa hañ’é, hasié. Niun hende lo hasié pa bo yu pero ta abo mes tin di hasié. I banda di dje bo no sa kon fuerte bo ta te ora bo pasa den algu asina i bo no tin otro opshon. Ser fuerte, Lianne a bisa.
9 mei
Gisette Wedervoort (sikólogo/yoga teacher)
No blòkia bo mes; no krusa man i pia
Yoga i spiritismo, nan ta mará na otro? Gisette Wedervoort ta sikólogo i yoga ‘teacher’ i el a splika si ku yoga ta hopi amplio. E nòmber mes ta nifiká union esta e ta unifiká. E unifikashon di bo mente i kurpa, nos tin tendensia di usa mente i kurpa separá pero e ta unu, si bo trata esun bo tin di trata e otro. Yoga no ta solamente e unifikashon di mente i kurpa pero e ta unifikashon di tur kos riba mundu. “Ami ta parti di e mata, mi ta parti di universo, mi ta parti di e bestia i p’esei yoga ta asina bon pasobra e ta siña bu, rekonosé bo mes den tur pasobra tur ta unu riba e mundu aki. Ta esei ta yoga, e union di tur e kosnan huntu”.
Kalma bo mente ku yoga…
Yoga tin di aber ku spiritismo? Hopi bia por tende ku ora bo ta práktika yoga, bo tin di bai den otro mundu. Riba esaki Gisette a bisa ku hopi bia e ta hañ’é ku e tipo di pregunta ei. Yoga ta un kombinashon pero e no ta spiritismo, ku yoga bo ta kalma bo mente, si bo tabata un hende ku ta pensa pensa pensa, yoga sigur ta kalm’é. “E ta hasié dor di diferente kos. Yoga ta un kombinashon di moveshonnan, posturanan, halamentu di rosea, banda (kaminda ta lòk bo kurpa pa subi e energia i mand’é bo kabes. Dikon mester subi energia, pasobra nos tin hopi energia abou na kurpa i p’esei na e kurpa ei bou por traha yu, gusta sèks i hasi tur e kosnan impulsivo, nos tin hopi angustia i depreshon i tur ta konsentrá abou na kurpa, nèt na e barika. Usando e halamentu di rosea i lòk kaminda ta sera ei bou ta mand’é ariba i por mira pas hopi grandi den bo sistema. Yoga tambe ta usa Mudras. Esei ta moveshon di man nan. E ta algu ku katolisismo ta usa. E tin efekto riba e mente ku e ta kalm’é. Tambe ta usa Kriyas, e ta kombinashon di energia huntu ku ta purifiká. Yoga no tin nada di aber ku spiritismo i no bai den otro mundu pero e ta e union, e base di tur religion kaminda ta siña e hende ku ami tin parti di abo den mi. I kon ami por kalma mi mente pa mi ta mihó hende riba e mundu aki.
8 oug
Il Gelato.
Patrizia Castellucchio (Patty)
Giovanni Minoia (Mino)
Gelato ku fruta di Kòrsou
I nos a siña traha Gelato (no eiskrim). Tabata un eksperensia diferente, den laboratorio serka Patty i Mino na Corriweg na Il Gelato.
Patrizia Castellucchio (Patty) a nase na Kòrsou. Su mama ta yu di Kòrsou. El a bai biba Italia na edat chikí pero awor ta bek na su isla natal huntu ku Giovani Minoia (Mino) kende ta italiano puru, no por a papia ni un palabra papiamentu ora el a bin Kòrsou. Pero awor e ta dominá e papiamentu te e por hiba un kombersashon. Esaki ta realmente integrá den e komunidat di Kòrsou. I nan dos a siña nos di Djasabra kon ta traha Gelato, e proseso for di e básiko te yega na e produkto ku nos ta kumpra i ku hopi bia nos ta yama eiskrim, pero no, e yama Gelato.
Tiki suku, tiki vèt
Patty a splika nos ku nan tin 4 aña ku e negoshi aki Il Gelato. Patty su mama ta di Kòrsou i tata italiano. El a biba aki te ku 6 aña i despues a bai Italia. 4 aña pasá, Patty ku su kasá a bin habri e negoshi aki. Loke nan tin ta realmente gelato italiano. Nan ta usa produkto fresku, e produktonan ta glutten free. Nan ta usa lechi fresku. E persentual di suku ta 18.2% i 5,3% di vèt ku ta hopi abou. Bibando na Italia nan no tabatin un gelateria. Nan tabatin un kafetaria i a bai skol pa siña traha gelato. E ta algu ku mester siña pasobra ta un trabou adishonal. Tur e materia prima pa traha gelato nan ta kumpra na Italia. Nan a bishita hopi kompania na Italia i despues a skohe kompania Babbi ku nan ta traha kuné. Tur nan produktonan pa traha gelato ta di kalidat haltu segun Patty.
19 des
Curtis Meris
10 aña pastor
Predikashon di mi kurason; 2020 ta un aña di lès i otro aña evaluashon
E luna aki, dia 8 di desèmber último Curtis Meris a selebrá 10 aña di a ordená komo saserdote. E tabata e promé pastor ordená den e pais nobo Kòrsou outónomo den reino. Curtis Meris komo pastor hóben. Ser pastor ta un trabou, pero kon e trabou aki ta hinka den otro. Esei ta loke pastor Curtis Meris a konta Djasabra, enfatisando ku no ta manera hende ta pensa ku e ta lanta mainta hinka rudia i resa te ora anochi sera. E ta hasi hopi i hasi hopi pa komunidat tambe.
Pastor i saserdote…
Na promé lugá e diferensia entre pastor i saserdote. Tin bia nos ta tende pastor i otro bia saserdote. El a splika Djasabra ku tin un diferensia entre pastor i pader. Saserdote bo ta usa pa tur dos, esta bo ta un saserdote pasobra bo ta ordená i ta parti di loke ta ta yama e saserdotenan. E palabra pastor hopi bia ta keda usá pa e pastor òf saserdote ku ta responsabel pa un parokia. I komo responsabel pa e parokia e tin e funshoná di wardadó òf pastor di e karnénan ku ta kuida nan. Pader no ta na kabes di un parokia. Tin bia e por ta asistí na un parokia i no tin un parokia mes i ta simplemente atministrá un parokia i no tin e funshoná di e ta pastor di e parokia.
Goso i legria…
“Mi a eksperensiá e 10 añanan ku hopi legria, goso pa motibu ku bo ta sinti ku realmente esaki ta loke bo a skohe i bo ta sinti bu felis aden. Esei ta un di e kriterionan ku bo tin di mantené semper den tur loke bo ta hasi pa sigurá ku bo ta felis den loke bo ta hasi. Tabata 10 aña di hopi legria i felisidat i 10 aña di hopi reto”, Pastor Meris a bisa.
30 yan 2021
Nicolle Lourens “Nigrita”
Tatuage temporal Henna; e historia su tras
Kreatividat ta loke nos a ripará siendo serka Nicolle Lourens konosí komo Nigrita den Fleur de Marie. Apesar di tempu difísil pa un aña kaba, Nicolle a sigui perseverá i ta mei mei di tur e artistanan kolega di dje den kurason di nos sentro di siudat. El a konta nos di Djasabra di su arte i en partikular e tatuahe temporal Henna ku e ta asina famoso p’e aki na Kòrsou.
Di hasi uña, kabei pa arte…
Nicolle a konta ku semper e ta gusta krea kos. For di chikí e ta gusta kosnan di man, kosnan chikí chikí manera hasi uña, kabei i tur un tiki, pero sin komprondé ku ta arte e tabata bezig kuné. Mas el a krese, el a komprondé ku ta arte e gusta hopi. Asina el a dal e paso pa konsentrá riba loke mas e ta gusta. Nicolle ta gusta reta su mes pa hasi algu nobo. Si e haña algu great, e mes ke hasié. E no ta simplemente kumpra e kos ei pero e mes ke trahe, i asina el a kuminsá ku e arte di Henna. E tabata hañ’é bunita pero nunka tabatin e posibilidat di haña un hende pa hasié pe. Ora el a topa e pakete kla pone den pakus, el a kumpr’é i a kuminsá trein tiki tiki. El a keda reta su mes pa hasié mas mihó i mas mihó te e por domin’é awor hopi bon.
Henna…
Nicolle a konta ku e ta gusta e Henna ku ta marka blou skur. Ta trata aki di un fruta ku ta krese den Amazon. Si wak ‘online’ por mira indjannan ku e liñanan pintá na nan kurpa, fini fini ta e mesun produkto nan ta usa, Tambe den e Henna mas maron/kòrá kima i esei ta bin for di India/Marocco. Ta trata ei di un mata i ta usa e blachinan seku di e mata, machiká nan i esei ta meskla awa, lamunchi i ‘essential oil’ i krea un pasta pa pinta kuné. Esei ta e dos tipo di Henna ku Nicolle ta pinta kuné, esta e maron i e pretu.
19 yuni
Morienne Leitoe
Stichting de Ladder
“de Ladder” ta konektá e mayor i yu
Stichting de Ladder a lansa resientemente un proyekto di guia pa mayor i yu. Nan ta drenta barionan, konsientisá riba edukashon di kurpa di e hóben. Morienne Leitoe ta inisiadó di e fundashon. El a splika Djasabra ku nan a kaba di lansa un kampaña i den esaki tin dos proyekto ku ta edukashon di kurpa, un informashon seksual i nan ta pasa na diferente skol i duna na mayor i yu pa interkambio i habri e komunikashon entre mayor i yu i tambe e konfiansa entre nan dos. Nan a opta pa hasié den kombinashon pa no keda na e mucha so ku ta haña e informashon ni e mayor so, pero nan dos huntu i asina nan por deliberá ku otro den e informashon seksual. E di dos proyekto ta e Pop Up comunity store. Esei segun Morienne ta un pakus di bario. Komo nan ta enfoká riba e mucha, i mirando ku tin hopi mayor tin e hopi difísil. No tur hende por bai Punda pa kumpra un paña. E parti higiéniko ta importante i p’esei nan ta bin ku un pakus i nan ke pa komunidat yuda lansa e pakus aki. Paña ku hende tin, asesorionan ku no ta usá, ko’i hunga, tur ta bon biní. Nan ta bai skolnan i e mucha tin chèns di bin serka nan i skohe dos sèt i algun asesorio. Tampoko ta lubidá riba e mayor pasobra e mucha tin famia i e por bai den komunikashon ku su famia i skohe algun paña i asesorio.
Nesesidat…
E fundashon aki tin 4 aña pará den kashi i awor a hasié aktivo. No a hasi nunka nada kuné. E tabata riba papel i aña pasá a opta pa lansa e stichting de Ladder. Nan a mira desaroyo ku ta bai rònt, nan a mira nesesidatnan pasobra e miembronan di direktiva ta hasi trabounan boluntario i nan ta mira hopi kos. Nan ta mira kosnan ku ta sosodé ku e atenshon no ta wòrdu duná manera mester ta. I p’esei a lansa e fundashon. Nan no ke hasié nan so pero ku komunidat. 10 luna pasá a lansa stichting de Ladder ofisialmente. Nan a hasi diferente kos pa purba, partisipá ku algun proyekto, mira i krese. Dos luna pasá Morienne ta kòrda el a bai serka su direktiva ku su ideanan i nan a aseptá mesora. Ta proyekto grandi pasobra nan ta traha ku bario i mester bai e barionan. Pero su direktiva a sostené i asina a kuminsá ku e kampaña.
17 yuli
Mosa Nena
Beyesa ta di paden bai pa pafó; e dama kurvá ta bunita
…Mosa Nena tabata na Kòrsou, kaminda el a kuminsá sondia e tereno pa e sertámen di beyesa di damas nan kurvá, e damanan balente. The Curves Academy ta loke Mosa Nena a kuminsá kuné komo akademia pa e damanan ku kurpa komo modelo. Despues di un sondeo online, a haña 6 embahador i a sigui e promé shoot pa Curves Academy.
Simbolisá e kurvá bunita
Mosa Nena ta un dama ku ta simbolisá e beyesa di un hende yen. Den entrevista anterior ku nos el a pone énfasis kon dia e tabata chikí el a keda tentá pasobra e ta gordo. Pero awor ku el a krese el a siña aseptá su mes manera e ta, I el a gana na kuminsamentu di e aña aki e kompetensia di beyesa di damanan kurvá. I ta den e kuadro aki el a lanta tambe The Curves Academy kaminda den nan promé presentashon a pone énfasis riba e ‘Body Positivity’, konfiansa propio i ta un plataforma pa hendenan curvy, plus sais pa damanan bira mas sigur di nan mes. Tambe si e persona ke kuminsá un karera komo modelo, e akademia aki ta duna un man den e kuadro ei.
21 oug
Wak bo imágen i no bo refleho
Richeline Koeiman a gradua resientemente pa Bachelor den lei na UDC. Un dama ku a kuminsá for di ZMLK, siguí pa MLK, VSBO, IFE i awor UDC i e ta un ehèmpel ku ni maske kon abou bo kuminsá, determinashon ta pone bu yega leu.
Tempu difísil…
Nunka mi a pensa ora ma kuminsá ZMLK ku mi lo a yega asina leu, asina el a bisa Djasabra. Awor e ta sintié hopi orguyoso pasobra el a pasa den tempunan difísil. E ta mira ZMLK komo e trapi di mas abou. Einan el a pasa den tempu difísil pasobra ta muchanan otro for di dje. Tin mucha hèndikèp i muchanan ku tin difikultat pa siña. Tabata un ambiente poko straño pa Richeline. Nunka el a imaginá di lo tabata einan i tabata difísil pe. E ta kòrda komentarionan di famia i konosínan ku a hasi e situashon aun mas difísil. El a sinti ku ZMLK no tabata algu pe.
E mihó den bachelor di Lei…
Di MLK el a bai PBL i den un aña el a bira TKL i einan a keda subi te ku el a yega awor aki na UDC. Pero Richeline tambe a studia 4 aña na IFE komo enfermera. Ora el a kaba IFE el a sinti ku e no ta kla pa bai traha. E ta sinti ku falta mas. Su ruman muhé parti tata a konseh’é pa e siñ’é lei. En prinsipio e no a mir’é pasobra e no ta mir’é komo abogado. Pero lei ta amplio. El a bai inskribí na UDC sin sa nada nada. E promé sinku lunanan tabata duru i a konosé sifranan manera 6 i siñando hopi duru. El a pensa ku kisas e ta robes pero tòg a sigui i den bringa bringa te awe ku su bachelor den law i komo esun mihó di UDC.
Richeline a sigui bisa ku ainda e no a yega kaminda e ke yega. E ke bai hasi un master den lei di laman. Ta trata di un lei ku ta atendé tur loke ta riba laman manera barkunan ku haña aksidente, lei di seguro, lei ku ta defendé nos flora i fauna i eseinan ta loke e ke spesialisá den dje. El a bisa di a kore stazje na Kustwacht i el a haña e inspirashon ku ta esei e gusta.
25 sept
Ayrton Kirchner
“Mi soño ta pa denter di 10 aña mi por aktua internashonal”
…Nominado pa diferente premio pa aktuashon, awe nos ta sera konosí un tiki mas ku Ayrton Kirchner. Hóben yu di Kòrsou, bibá na Hulanda, studiá den ramo di aktuashon, a tuma parti na diferente obra di teater i riba su nòmber diferente premio i nominashon. E tabata studiando na Kòrsou International Business na UoC/UNA, den su di dos aña di estudio el a sinta pensa ku e tin gana di kaba e estudio ei pero e no sa si e lo kab’é. E tabatin mas interes den sali traha, hasi kos pa e mes ku e tabatin den estudio. El a hasi un tèst di eskoho di estudio i e tòp 5 resultadonan a sali; kantante klásiko, aktor, kabaretera, ‘teathermaaker’, regisseur. Nunka el a kere ku esei lo tok’é, pasobra semper el a pensa kiko e tin di aber den e mundu di aktuashon, e mundu kreativo siendo su tata ta un hende artístiko i kreativo. Nunka Ayrton a pensa den e direkshon ei.
Rol di Nelson Mandela tabata impreshonante
Ayrton no a traha solamente den obranan di teatro manera el a bisa Djasabra, pero tambe den tur kos ku tin di aber ku televishon manera pelíkula, seri, propaganda. For di 2015 el a kuminsá komo aktor profeshonal. Den e añanan ku e tabata kabando skol i hasi un produkshon profeshonal di teater. Ta den tantu produkshon di teater ku Ayrton tin tras di lomba, esun ku mas a toke ta e ròl di Nelson Mandela. Ayrton a kontestá e pregunta ei sin pensa, pasobra e ròl ei tabata esun ku mas a toke manera el a bisa nos. El a aktua komo Nelson Mandela den un monólogo di teater na De Nieuw Amsterdam, den Nieuwe Kerk na Amsterdam. Esei a toke mes. E historia di Nelson Mandela, espesialmente e temporada ku e kier a bira presidente, tabatin e kontakto ku su kasa e tempu ei Wini Mandela, pa splik’é ku su vishon ta otro for di e vishon di Wini Mandela. E monólogo ku Ayrton a aktua ku ta skibi den e outobiografia di Mandela, tabatin un anochi ku el a sinta ku Wini Mandela i nan tabatin hopi diskushon. Einan el a papia hopi di su pashon di ántes pakiko el a lucha, pakiko el a kai sera, kon el a sintié tempu e tabata sera, kon el a sintié pa ku su kasa i su yunan i na momentu ku el a Sali i tabata bezig ta traha pa bira presidente kon e ta sinti i kiko ta su vishon pa Zùit Afrika. Esei tabata algu impreshonante i Ayrton nunka mas ta lubidá esei.
9 oktober 2021
Marc Anthony Jordi Pengel
Tur kos ku bo imaginá ta bira realidat i esei mi a gusta di “Fashion Design”
Ku 24 aña Marc Anthony Jordi Pengel tin su master den “Fashion Design”. El a studia na universidat di Bèlgika i awor e ta kla pa su mes liña di diseño Marc Martha. “Tur kos ku bo imaginá ta bira realidat i esei mi a gusta di Fashion Design”, Marc Anthony a konta Djasabra.
Studia na Bèlgika
Marc a nase na Kòrsou pero ku un aña a bai biba Hulanda. Apesar di a biba na Hulanda for di su promé aña di bida, Marc ta dominá su papiamentu hopi bon. E ta bisa ku nunka bo tin di lubidá bo mes pais i e papiamentu ta bo idioma i bo mester keda kuné. Despues di su estudio básiko el a drenta e akademia di Royal Academy of Fine Arts Antwerp. Ta trata di e skol di mas mihó pa studia “fashion design” na dje. Tabata un estudio hopi duru pasobra nan ta push bo pa bo bai mas dilanti i mas profundo den investigashon i diseño. Einan Marc a haña su bachelor i despues su master.
Siensia, fashion i arte
“Fashion Design” ta hopi diversifiká. Pa Marc ora e ta diseñá e ta kuminsá ku un inspirashon. E ta wak tur loke e ta mira rondó di dje i tambe e ta lesa hopi buki. Su kolekshon último el a kombiná siensia i e fashion i arte. I pa esei el a hasi un investigashon tur kaminda, pa despues e pinta, skohe e telanan di paña i traha e paña. E por hasi hopi kos. I den e tempu aktual di e pandemia di Corona, tin “photoshoot”, pelíkulanan ku por traha, loke ta nifiká ku por hasi tur kos.
20 november 2021
Angelo Elisabeth
Tasnan di kueru ‘Marcus Elizabeth’ diseñá pa yu di Kòrsou
Angelo Elisabeth a gradua den Mode design i el a diseñá su propio tas i marka Marcus Elizabeth. Na yüni di e aña aki el a gradua Bachelor Cum Laude den Mode Design en Styling. Angelo tin 13 aña na Hulanda.
Na Kòrsou el a kaba Radulphus College i a traha un aña i mei na Kòrsou i despues a bai Hulanda pa sigui studia. Na Hulanda el a studia komunikashon promé, pero e tabatin e sentimentu pa e hasi algu ku moda i kier a kombin’é ku komunikashon. El a biba na Rotterdam, despues move pa Amsterdam. Einan el a haña e konekshon ku moda. E tabata e promé hende hòmber ku a kuminsá ku un ‘vlog’. Ounke segun Angelo for di chikí e tin e konekshon ku moda. El a nase religioso i tur djadumingu tabata bai misa. Eseinan tabata un oportunidat pe eksperensiá kon pa bisti. Paña pe for di chikí tabata masha importante pe. Ku su ‘vlog’ el a haña hopi oportunidat. El a sera konosí ku modanan grandi manera Givenchy i hopi mas. El a sera konosí ku hopi hende den moda. Angelo a bai traha komo PR pero solamente pa 6 luna i einan el a skohe pa tòg bai den direkshon pa e por tin su propio marka. El a hasi investigashon i a disidí ku tòg e tin di bai skol bek pa siña. E ke ekspresá su kreatividat, e ke konta un historia ku su artíkulonan i asina Angelo a drenta Artemis na Amsterdam un akademia di style. El a terminá su promé aña pero mester a bai London kaminda el a biba 2 aña. Einan el a sera konosí ku trahamentu di tas. Angelo tabatin un bon maestro ku ta traha tas pa e nòmbernan di mas konosí na London. I p’esei por mira esei na loke Angelo mes a produsí, ku e kalidat ta resaltá.
Despues di London pa 2 aña el a bai bèk Hulanda i terminá su skol. Na yüni e aña aki el a terminá su estudio ku tur 10 riba su diploma.
Tas di kueru i di kalidat
Despues di su promé tas, el a sigui mehor’é mas i mas. Esaki el a hasi ku e eksperensia ku el a haña na London den trahamentu di tas. Kada tas di dje tin un nòmber i koló. El a lansa e tasnan komo parti di su estudio. Angelo a bisa ku e mes por traha e tasnan pero e ta lag’é na hendenan ku tin mas eksperensia. E tasnan ta keda trahá na Spaña pa un atalier ku tabata traha Louis Vuitton. E tasnan ta karga e nòmber di Marcus Elizabeth. E Elisabeth ta pa su fam, i Marcus ta su nòmber mei mei. E diseñonan ta Maxima, Tube.
