Dje forma akí e vehíkulonan a keda miéntras ku e sinku hóbennan ku a aktua di forma iresponsabel a pèrdè nan bida.
DUBLIN, Irlanda (AFP).- E Promé Minister irlandes, Michael Martin, a duna di konosé ayera di ta sinti su mes “konmové” pa motibu di morto di sinku hóben den un aksidente. E hóbennan tabata kore den nan outo riba man kontrali.
E aksidente a tuma lugá djadumingu último ora ku e outo den kua nan tabata kore, i ku tabata sirkulá na velosidat haltu riba man kontrali riba un outopista na zùit di Dublin, a dal kontra di un otro vehíkulo. Kuater okupante, entre nan un mucha hòmber, kendenan tabata den e otro outo, a resultá gravemente heridá.
E drama a tuma lugá poko despues di un otro aksidente den Dublin, bou di sirkunstansianan similar, den kua nuebe persona a resultá leshoná.
E Promé Minister a duna di konosé ku “no tin ningun toleransia” pa loke e hóbennan ta hasi, esta di kore outo riba man kontrali, pa nan haña un ‘like’ riba media sosial. Un dia promé, un funshonario polisial tambe a kondená e práktika i a kalifiká esaki di ta “iresponsabel i peligroso”.
Segun un miembro dje sindikato di polis irlandes, gruponan di hóben ta usa media sosial pa “superá otro”, grabando nan interakshonnan ku polis i di forma deliberadamente provoká persekushonnan.
Segun e sindikalista, e outonan ta kore di forma kontrario riba ‘highway’ pa motibu ku polis tin instrukshon pa no persiguí vehíkulonan den situashonnan di hopi riesgo.
