Gen TP53 ku ta oumentá di forma konsiderabel e riesgo di kanser.
BRUSSEL (AFP).- Na Bèlgika nan a start un investigashon pa saka’fo kon un danes di spèrma ku un gen potensialmente kanseroso lo por a bira donante pa prokreá 52 mucha entre 2008 i 2017. Esaki segun Ministerio belga di Salú a duna di konosé, den un kaso ku ta envolví vários pais europeo.
E donante ku ta mustra bon di salú i no tin antesedente familiar konosí di kanser, a kumpli ku normanan reglamentario na e momentu di donashon.
Pero mas despues a deskubrí ku e tabata portadó di un mutuashon dje gen TP53, vinkulá ku e sindrom di Li-Fraumeni (LFS), un trastorno hereditario straño ku ta oumentá di forma konsiderabel e riesgo di kanser.
Por lo ménos 10 kaso di kanser a keda detektá entre e 52 muchanan nasí di su donashonnan rònt Europa. Parse ku a usa spèrma dje donante na Bulgaria,
Chipre, Alemania, Spaña, Hungria, Irlanda, Gresia, Hulanda i Polonia.
A emití e alerta den 2023 despues ku a identifiká kanser serka algun mucha konsebí kuminsando ku su donashonnan den un klínika na Dinamarka. E mesun aña ei a notifiká e Agensia Federal di Remedi i Produktonan Sanitario di Bèlgika.
Pero e minister di salubridat, Frank Vandenbroucke, a duna di konosé ku ta djaluna último el a keda informá dje kaso. “E informashon ei mester a keda transmití di forma inmediato na e minister kompetente”, segun e bosero.
Un revishon interno a identifiká 37 famia afektá na Bèlgika, kaminda 52 mucha a nase dje donashonnan aki entre 2008 i 2017. Outoridatnan a bisa ku no nesesariamente tur ta biba na Bèlgika.
E skandal a trese na kla aparente fayonan ku uzo di lei belga, ku for di 2007 ta limitá e spèrma di mesun donante na un mínimo di seis hende muhé.
