Akshon di protesta den skuridat di anochi na Cuba. E problema di suministro di koriente ta hopi serio riba e isla.
LA HABANA, Cuba (AFP).- Un tribunal na Cuba a kondená seis manifestante na kastigunan te ku seis aña di prizòn pa un protesta den 2024 kontra di e falta di elektrisidat. Den e kaso, tratá den e sala di delitonan kontra di seguridat di estado di Tribunal Provincial de Villa Clara, 270 km ost di La Habana, tres di e seis manifestantenan a risibí seis aña di prizòn i otro tres a haña sinku.
Algun shen hende, entre nan e seis hòmbernan kondená, dia 20 di òktober di 2024 a subi kaya di Manicaragua, un pueblo di Villa Clara, miéntras ku e pais tabata den un skuridat total debí na kolapso di e sistema di oriente. E manifestashon tabata kontra di e gobièrnu lokal “ku e propósito pa reklamá pa koriente”, batiendo riba kosnan di metal i a provoká zonidonan fuerte, loke a afektá e trankilidat di siudadanonan i “interumpí e sirkulashon den kaya”, segun teksto dje sentensia.
Observatorio Cubano de Derechos Humanos, ku sede na Madrid, a bisa den un komunikado ku e sentensianan aki ta buska pa “kriminalisá e protesta síviko, sirbiendo komo instrumento di represhon i anulashon di derechinan humano”.
E vários dje tipo di protestanan aki, ku ántes ningun hende tabata tribi riba e isla goberná pa Partido Comunista, a surgi den 2022.
Meimei di un krísis hopi grave di energia, Cuba a enfrentá seis blackout generalisá den un aña di tempu. E 9.7 mion habitantenan dje pais tur dia ta sufri oranan largu sin koriente, ku un promedio di 15 ora diario den luna di sèptèmber último.
