AVELAR, PORTUGAL, AP.- Por lo ménos 61 persona a muri den kandelanan di mondi den sentro di Portugal, mayoria di nan pegando den nan outo na momentu ku e kandela a yega riba kaminda. Promé minister Antonio Acosta, a deskribí esaki komo “e tragedia mas grandi den bida humano ku nos a eksperensiá den vários aña”.
E gobièrnu a dekretá tres dia di luto nashonal na memoria di e víktimanan djadumingu.
Na prinsipio, outoridat a informá ku tabatin 62 persona ku a fayesé, pero mas despues promé minister Antonio Acosta a redusí e sifra na 61 i a splika ku un víktima a wòrdu kontá dos biaha.
54 persona a resultá heridá, inkluyendo kuater bombero i un menor heridá gravemente, segun e kanal di televishon públiko RTP, kende a sita e funshonario di Ministerio di Interior, Jorge Gomes.
Outoridat ta indiká ku posiblemente un rayo a provoká e kandela den e zona di Pedrogai Grande, ya ku investigadornan a haña un palu ku a risibí un impakto durante un “tormenta eléktriko seku”, segun indikashon di bosero di polis nashonal hudisial. E tormentanan seku ta normal ora e awa ku ta kai ta evaporá promé ku esaki yega tera debí na temperatura haltu. Igual ku otro paisnan den Europa, Portugal ta propenso na kandela di mondi den lunanan seku.
