WILLEMSTAD.- Mester tin igualdat den Reino riba e maneho di visa. Miéntras ku Hulanda ta fleksibilisá su reglanan, na Kòrsou esaki no ta e kaso. Parlamentario pa KEM, Anthony Godett, ta boga den e kuadro akí pa eliminá visa pa paisnan manera Repúblika Dominikana.
“E echo ku siudadanonan di e paisnan akí mester di un visa pa biaha pa Kòrsou ta difikultá transporte di persona i produkto (komersio) pa Kòrsou. Esaki ta afektá ekonomia di Kòrsou manera turismo ku Zona Liber”, Godett ta opiná. Tambe e ta afektá lasonan familiar entre Kòrsou i Repúblika Dominikana.”.
Segun e parlamentario ta for di aña pasá a primintí ku ta eliminá visa pero te awe no a kumpli. “Mandatarionan di Kòrsou mester demostrá determinashon ora ku ta atendé e tipo di tópikonan akí ku Hulanda.” Godett ta bisa ku semper e tabata un luchadó ferviente di moveshon liber di tur persona na mundu.
Ta den e kuadro akí e ta di opinion ku no por sera frontera na niun parti di Reino. E ta bisa mas aleu ku ainda tin buelonan regular entre Kòrsou i Repúblika Dominikana pero si e situashon sigui asina e kompanianan aéreo tambe ta sufri di e bahada den fluho di pasahero. Godett ta mustra riba sifranan di turismo ku Ofisina di Turismo, CTB ta publiká tur luna pa supstansiá su ponensia.
“Sifranan ku CTB ta publiká ta indiká un bahada den e kantidat di persona for di Repúblika Dominikana ku ta bishitá Kòrsou. “E sifranan akí ta prueba ku den kaso ku no bini un kambio, ku tempu lo no tin sentido mas pa tin trafikashon entre Kòrsou i Repúblika Dominikana ku tur e konsekuensianan negativo ku esakinan ta trese kuné.”
Mas di e konsekuensianan negativo segun Godett ta ku e situashon aktual ta stroba Kòrsou pa hasi bon uso di e oportunidat pa trese fruta i bèrdura for di Repúblika Dominikana kontra preisnan faborabel. “Produktonan ku mester komplementá loke ta produsí na Kòrsou kaba pa asina ofresé pueblo fruta i bèrdura saludabel pa e kome.”
Foto:
…Anthony Godett…
