Promé minister sudanes Kamil Idris ta hiba palabra. Otro luna ta kumpli tres aña ku e pais tin un konflikto interno ku gruponan matando otro.
JARTUM, Sudan (AFP). Un atake riba un sentro di salú den Sudan a laga 64 morto, entrenan 13 mucha, i 89 herido, segun Organisashon Mundial di Salú, ku a pidi pa para ku e konflikto sangriento den e pais. E guera ku a bin ta bati Sudan for di aprel di 2023 a laga desena di míles di morto i miónes di hende ku a hui, den loke Nashonnan Uní ta konsiderá komo “e pió krísis humanitario na mundu”.
“Organisashon di Derechinan Humano a verifiká otro atake kontra di institutonan di kuido den Sudan, e biaha’ki, Hospital di Enseñansa El Daei den e kapital di Darfur Ost a keda ataká, matando por lo ménos 64 persona, inkluso 13 mucha, dos enfermera i un dòkter ademas di vários pashènt”, segun e direktor a duna di konosé.
E ofisina humanitario di Nashonnan Uníden Sudan a ekspresá su konsternashon pa “e atake riba un hospital den parti ost di Darfur”. E grupo di derechinan sudanes Emergency Lawyers, ku ta dokumentá atrosidatnan den e guera entre ehérsito di Sudan i paramilitarnan di Forsanan di Apoyo Rápido, a bisa ku dos drones di ehérsito a bombardiá e hospital”.
Debí na e dañonan enorme ku e hospital a sufri, mester a para tur servisio médiko esensial ku lo a tuma lugá einan.
Di akuerdo ku sifranan ofisial, despues dje tragedia di djabièrnè último e kantidat di personanan a pèrdè nan bida den atakenan kontra di instalashonnan di salú a alkansá 2.036 den 213 akshon.
