Polisnan ta bai ku sospechonan ku a keda arestá durante di “Operacao Contencao” den e ‘favla’ Vila Cruzeiro. Alrededor di 2.500 agente polisial a tuma parti den e akshon pa arestá trafikantenan di droga..
BRASILIA (AFP).- Rio de Janeiro ayera a biba esenanan di guera den e operashon polisial mas fuerte kontra di krímen organisá den e siudat, ku por lo ménos 64 morto. Den kareda di 2.500 polis fuertemente armá a penetrá den dos zona den nort dje siudat, kaminda tabatin tiroteo, insendio i enfrentamentu ku supuesto sospechosonan.
Outoridatnan a partisipá den e operashon pa “kombatí e ekspanshon teritorial di Comando Vermelho”, e organisashon kriminal mas grandi di Rio de Janeiro, segun gobièrnu a indiká. E kantidat di morto ta 64, entre nan kuater polis, segun un fuente di servisio di seguridat de estado di Rio, ku no a duna detaye si e demas mortonan ta únikamente sospechosonan.
Fotógrafo di AFP a mira kon desena di polis fuertemente armá a drenta e “favela” Vila Cruzeiro i a bai ku vários hòmber detené, den su mayoria lomba sunú i pia abou. Ráfaga di tiru tabata zona mientras ku negoshinan a sera nan porta.
Operashon polisial kontra di krímen organisá ta frekuente den barionan di Rio, kaminda ta normal ku agentenan ta enfrentá trafikantenan tirando i e poblashon ta sufri meimei dje guera ku ta surgi.
Te ku awor e operashon mas letal den Rio a tuma lugá durante e pandemia di covid, den 2021, na momento ku 28 persona a muri riba un dia di e akshon polisial.
Razia den mardugá
Polisnan a drenta den mardugá di djamars den dos zona konosí komo komplehonan di Alemao i Penha usando 32 vehíkulo blindá. Na e sitio nan a konfiská un kantidat grandi di droga, segun e gobernador Claudio Castro, aliado polítiko dje eks presidente Jair Bolsonaro. Por lo ménos 81 persona a keda detené i polis a konfiská 42 arma di kandela. Dos helikòpter i vários drones a kompañá e akshon.
“Mas ku 200.000 residente a keda afektá pa e skolnan ku a sera, bùsnan ku a keda desviá i unidatnan di salú di kua a suspendé e servisio”, segun Castro.
Korte Supremo di Brasil den 2020 a imponé algun restrikshon kon polis por tene akshon den e favelanan, pero e aña’ki a kita e medidanan. Spesialistanan i organisashonnan di derechinan humano ta eksigí pa para tipo di operativo asina pa motibu ku nan no ta duna e resultado deseá.
Den 2024, alrededor di 700 persona a muri durante intervenshonnan di outoridatnan den Rio.
