NASHONNAN UNI.- Un 7.300 tòn di kuminda pa repartí na Niger ta pegá aktualmente den tránsito debí ku fronteranan ta será, esei di akuerdo ku Nashonnan Uní, miéntras ku e krísis ta kontinuá den e pais aki for di dia di e gòlpi militar di 26 di yüli. Banda di esei, preisnan di kuminda a subi ku un 21 porshento, kual ta un problema serio den e pais unda un 3.3 nigeriano òf 13 porshento dje poblashon tin falta grandi di kuminda, esei di akuerdo ku un deklarashon di Nashonnan Uní.
“Mas ku 7 mion hende, ku ta un 28 porshento di e poblashon, ta na riesgo pa bai den un situashon severo di falta di kuminda debí na subida di preis i pèrdida di nan bibienda, kual ta konsekuensia di e krísis polítiko ku tin den e pais. Restrikshon di akseso ta stroba e entrega di yudansa esensial. WFP, e agensia di alimento di Nashonnan Uní, tin un 7.300 tòn di kuminda inkluyendo kuminda spesial pa tratamentu i prevenshon di malnutrishon pero ku ta pegá den tránsito debí ku a sera frontera”.
Nashonnan Uní ta hopi preokupá ku donantenan lo hala atras den nan esfuerso, pasobra kualke suspenshon òf interupshon den e donashonnan, no solamente lo hasi impakto riba e rèspòns humanitario, pero tambe lo stroba un kantidat grandi di hende di haña alimento, ku tur e konsekuensianan ku esei por tin.
