Riba e potrèt: Presidente mehikano Clauda Sheinbaum ta papia ku víktimanan dje inundashon provoká pa fuerte áwaseru ku a afektá seriamente e riu Tamazunchale. Ta teme ku e kantidat di morto lo sigui oumentá den próksimo dianan.
CIUDAD DE MEXICO (AFP).- E kantidat di morto konfirmá pa fuerte áwaseru ku a provoká inundashonnan na México a oumentá te na 70, miéntras ku sifra similar di hende ta pèrdí, segun e presidente Claudia Sheinbaum. E desaster ku a kuminsá siman pasá ku vários dia siguí di áwaseru intenso, ta mantené komo 160 bario tantu di sentro komo parti ost di e pais sin komunikashon, debí na kamindanan ku a keda blòkiá.
“Ta trata di 70 persona kendenan lamentablemente a pèrdè nan bida, 30 den Veracruz, 21 na Hidalgo, 18 den Pueblo i un persona den Queretaro, ademas di 72 persona ku no a keda lokalisá”, segun Sheinbaum den su konferensia di prensa di tur mainta.
E estado i Hidalgo, bisiña di e kapital mehikano, den sentro dje pais, ta konta ku e kantidat mas grandi di munisipionan ku kua no tin komunikashon (84) debí ku hopi di nan ta den regionnan di seru di kua e kamindanan a sufri dañonan konsiderabel.
Un ekipo di AFP a konstatá destrukshon di kasnan i infrastruktura den vários pueblo di Hidalgo, di kua e abitantenan a pèrdè kasi tur nan propiedat i ta sklama pa yudansa debí na skarsedat di kuminda.
Veracruz, den parti ost dje pais i ku kosta na Gòlf di México, ta e estado mas gòlpiá pa e inundashonnan. Vários área dje siudat ta konta ku loke nan ta yama “rios de respuesta rápida”, kaminda fásilmente laman ta subi i yega tera.
Mas ku 12.700 militar di Ehérsito di Marina a keda desplegá den e estadonan afektá p’e desaster, ku kantidat di brùg destruí, loke ta hasi mas difísil e operashon pa hiba yudansa pa e poblashonnan aislá.
