WILLEMSTAD.- Interupshon den suministro di koriente ta kousa daño ekonómiko direkto kaminda empresarionan ta pèrdè entrada. “Restorantnan ta pèrdè entrada, supermerkadonan por pèrdè produktonan ku mester keda friu, fábrikanan mester para produkshon, i hotèlnan mester kompensá huéspetnan. E gastunan aki no semper ta inkluí den e evaluashon di e sistema di elektrisidat.”
Pa e motibu aki kolaboradó di frakshon di PAR, Luigi Faneyte ta enfatisá ku Kòrsou mester sa kuantu un ora sin koriente ta kosta ekonomia. “Ora nos sa kiko e daño ta kosta, nos por evaluá mihó si un invershon pa hasi e sistema mas konfiabel realmente ta bal e plaka.” E ta splika ku un parke di bientu por produsí desena di megawòt na koriente, pero ora bientu baha òf bai drumi, e produkshon tambe ta disparsé.
Pènel solar ta produsí energia durante dia, pero no durante oranan di anochi ora demanda por ta na su punto di mas haltu. Pa e motibu aki, segun Faneyte Kòrsou mester tin, banda di energia duradero, tambe sufisiente kapasidat di produkshon ku por ta disponibel ora realmente tin mester di dje.
“E problema di koriente ku nos a mira resientemente ta mustra ku den e meskla di produkshon tin un punto débil. E transishon pa energia duradero mes no ta e problema, pero un transishon ku no ta bon ekilibrá si por bira un problema”, Faneyte ta indiká. E ta mustra ku Aqualectra ta responsabel pa e operashon i maneho di un parti grandi di e kadena di elektrisidat, Pero Aqualectra no ta traha su so.
“Gobièrnu, komo akshonista i esun responsabel pa stipulá maneho, i tambe RAC, komo reguladó, tin nan propio responsabilidat. Gobièrnu ta determiná den gran parti e rumbo di maneho. RAC ta pone e reglanan pa tarifa, kalidat i konfiabilidat di suministro. Aqualectra mester operá e sistema di manera konfiabel i efisiente den e kadernan aki.”
P’esei, segun Faneyte e diskushon no por ta solamente riba ken a kousa e último interupshon. “E pregunta mas importante ta: E sistema kompletu ta organisá di tal manera ku nos por evitá i apsorbé e tipo di interupshonnan aki mas tantu posibel?” Esaki ta pone Faneyte yega na e konklushon ku e solushon no ta ménos kapasidat generá pa bientu, sino un mihó sistema.
“E kontesta no ta pa pone un paro na e transishon pa energia duradero. Kòrsou mester di un sistema integrá kaminda energia di bientu, energia solar, sistema di bateria, sufisiente produkshon konfiabel, i un ret fuerte di elektrisidat ta traha huntu. No por wak solamente kuantu megawòt nos tin instalá, mester wak prinsipalmente kuantu megawòt por garantisá ku ta disponibel durante e momentu ku demanda ta na su punto mas haltu.”
E sentral nobo na ku ta konstruyendo por tin un papel importante den esaki, pero e sistema di bateria i e modernisashon di e ret tambe ta esensial e kolaboradó di frakshon di PAR ta mustra.
