WILLEMSTAD.- Ministerio di Desaroyo Ekonómiko a anunsiá durante un konferensia di prensa siman pasá ku ta bai traha riba un vishon nashonal pa turismo kaminda lo definí e posishon ku Kòrsou ta deseá komo destinashon riba medio i largu plaso, i lo determiná e kondishonnan, instrumentonan i responsabilidatnan institushonal nesesario pa logra esaki. Tambe lo desaroyá un “Tourism Satellite Account” pa por hasi un análisis mas eksakto di e impakto ekonómiko ku turismo tin riba nos isla.
Konsehero di Ofisina di Turismo (CTB), dr. Dino Daal a bisa for di febrüari último den e podcast 3’or ku Gino, ku el a hasi hopi investigashon riba aspektonan ku tin di aber ku ekseso di turismo i kon otro destinashonnan a atendé ku situashonnan asina. E ta mustra ku el a hasi estudio riba e tipo di aspektonan akí na destinashonnan oropeo manera Italia, Hulanda i Spaña.
“Un di e kosnan ku nos a studia ta kiko e paisnan akí a hasi pa manehá kresementu aselerá di turismo”, Daal a deklará. Un otro aspekto ku el a studia ta efektonan di Airbnb ku a hasi su entrada fuertemente na hopi pais i kon a atendé ku esaki entre otro den kuadro di lei. “Na sierto pais e pedido pa Airbnb ta asina grandi ku hendenan lokal no por paga preisnan di biennan inmóbil.”
Un problema ku Daal ta rekonosé ta manifestando na Kòrsou tambe i ku e ta eksperensiá aktualmente den seno di su famia. E ta mustra ku for di dia ku el a doktorá na 2017, el a trese dilanti den su disertashon ku a base di estudionan ku a hasi por mira ku kresementu aselerá di turismo por trese otro desaroyonan kuné manera oumento di preis di komestibel i oumento di preis di propiedat.
“Aworakí Kòrsou tin dòbel e kantidat di turista kompará ku 2017. Na un banda ta bon pa sigui traha riba oumento di turismo, pero bo tin ku maneh’é sino e ta bin morde bo bèk den bo kara.” Maneho di Medio ambiente ta otro reto ku Kòrsou lo enfrentá debí na kresementu di turismo aselerá ku ta eksperensiá, Daal a sigui bisa.
El a mustra riba Carmabi ku a saka un rapòrt devastador riba efektonan di awa di kloaka ta kosta sùit di Kòrsou. Daal ta kere ku mester bai atendé ku e problemátika akí di forma aselerá pasobra e ta trese basta reto kuné. Banda di esaki, Daal ta di opinion ku Kòrsou mester kuminsá traha pa yega na un plano mas haltu ku su turismo.
“Salí for di desaroyo sostenibel i bai pa ‘turismo regenerativo’, pues hasi bo turismo di tal forma ku ta sostené inisiativanan ku ta regenerá e desaroyo di turismo.” Segun Daal tin algun destinashon turístiko den Karibe ku ta riba e nivel akí kaba. Asta na Kòrsou e ta tuma nota ku tin esfuerso den sierto kaso riba e nivel akí.
Pero, te asina leu ku e sa e no ta tuma lugá di un forma strukturá ku tur nanishi den mesun direkshon. Un di e komponentenan importante den esaki ta sosten di e pueblo, el a indiká. Pa e motibu akí Daal ta kere ku den futuro mester tene hopi enkuentro den bario kaminda ta tene pueblo na altura kiko ta pasando i alabes tende di nan kiko ta nan preokupashonnan òf deseonan i ahustá maneho riba e puntonan akí.
“Tambe lo ta bon pa envolví organisashonnan di bario den esaki.” A base di konsulta regular ku e ta tene ku ofisina di turismo (CTB), Daal ta bisa ku e sa ku e ofisina su departamento di desaroyo di produkto ya kaba ta dediká hopi atenshon na esaki. Ya kaba tin un kantidat di aspekto manera tráfiko, akseso na playanan, restorantnan yen, oumento di preis di produkto ku, segun Daal, ta forma un iritashon pa siudadanonan di Kòrsou. Ta p’esei el a trese dilanti ku mester manehá e oumento di turismo di forma ku e pueblo mes ta sinti ku e tambe ta benefisiá for di e kresementu turístiko.
