Enkuesta ICUC: 75% siudadanonan ta haña ku gobièrnu a atendé hopi bon ku COVID-19

WILLEMSTAD.- For di un enkuesta ku universidat ICUC a hasi, ta resultá ku 75% di siudadanonan ta haña ku gobièrnu a atendé bon i hopi mas bon ku henter e situashon di Corona vírus na Kòrsou.
Den e siman di 25 di mart 2020 Inter Continental University of the Caribbean a start un investigashon riba kon bon informá nos komunidat ta pa ku e desaroyo di Corona vírus na Kòrsou. E grupo di investigashon ta eksistí di kandidatonan di un grupo ku ta studiando pa Master den Business Administration. E grupo aki di 27 kandidato huntu ku profesor Gilbert Cijntje, dr Rayla Pikeri i Sidney Justiana MBA a ehekutá e investigashon aki.
13 di mart 2020: un dia determinante pa futuro di nos pais. Dia 13 di mart 2020 nos pais a ser konfrontá ku e promé persona na Kòrsou ku a tèst positivo pa Corona vírus. Un dia ku tur kos a bòltu den nos pais ku lo bai tin su konsekuensia pa hopi aña. Esaki no solamente lokal pero espesialmente internashonal ku lo tin su konsekuensia tambe direktamente riba Kòrsou.
A puntra na promé lugá kiko ta e síntomanan di Corona vírus. Nos por nota aki ku mayoria grandi di e respondente sa ku keintura (92%) i tos seku (92%) ta síntomanan importante. 88% di e respondentenan por a menshoná tur dos.
A puntra e respondente via di kua medio e ta tende e informashon. Hopi hende ta wak i mira televishon, radio, medio sosial (FB, Instagram, WhatsApp, ets.). Kasi 30% ta lesa esaki den korant.
Por nota ken ta komprondé e terminologia ‘social distance’. Kasi 85% di e esnan riba 60 aña ta komprondé e terminologia. E grupo ku ménos ta komprondé e terminologia difísil aki ta e personanan ku edat entre 18 pa 29 aña. Ta bon pa wak ku kisas mester splika e terminologia na lugá di usa palabra manera distansia sosial.
A puntra e respondente kon bon/malu e ta haña ku Gobièrnu a atendé e asuntu di epidemia Corona vírus. Nos por nota ku un mayoria grandi (75%) ta haña ku Gobièrnu a atendé epidemia aki bon te hopi bon. Mas o ménos 24% ta di opinion ku e aktuashon di Gobièrnu tabata dudoso te malu/hopi malu.

Den e enkuesta organisá pa ICUC tabatin mas pregunta por ehèmpel preguntanan ku ta bai riba e medidanan tumá te e dia ei (19 mart) manera stòp vuelo, stòp komementu na restorant, i sera skol. Den un próksimo artíkulo nos lo por analisá esakinan.
Ta bon pa tene kuenta ku e opinion aki ta di dos siman pasá mas o ménos. Mester tene kuenta ku opinion di un komunidat ta konstante den moveshon, esta ku e sifranan aki por subi o baha. Banda di esaki vários otro medida a bini despues ku naturalmente tin su efekto riba opinion di hende.

SHARE

LEAVE A REPLY