WILLEMSTAD – E departamento ku ta enkargá ku investigashon di ladronisia di vehíkulonan, a konstatá ku últimamente mayoria vehíkulo ku wòrdu hòrtá, ta esnan ku ta keda stashoná dilanti di un bibienda òf den kurá di un bibienda.
E vehíkulonan ku e aña aki te ainda a keda hòrtá na kas, ta representá 80 porshento di e kantidat total di vehíkulonan ku a keda hòrtá rònt Kòrsou den e promé 2 lunanan di 2024.
P’esei un yamada ta bai na tur siudadano i doñonan di vehíkulo pa ta alerta riba ladronisia di vehíkulonan na kas.
Sigur si bo vehíkulo ta para pafó di kurá òf bo kurá di kas no ta (kompletamente) será, tuma e medidanan apropiá pa evitá ku bo ta bira víktima.
Instalá alarma, pone un lòk pa bo stürwil òf kualke deskonekshon na momentu di start e outo, pa bo no mester pèrdè bo ko’i kareda. Alabes nos ta keda rekomendá pa stashoná bo vehíkulo kaminda ku tin sufisiente iluminashon i moveshon di hende òf tráfiko. Kuerpo Polisial ta sigui analisá e último tendensianan den kriminalidat pa nos huntu ku bo por kombatí tur loke ta ilegalidat i keda biba seif i den tur trankilidat.
