BARCELONA, AP.- Nuebe migrante a wòrdu evakuá di un boto di reskate miéntras un grupo di yudansa spañó ta purbando di haña un haf kaminda e otro 151 pasaheronan por baha, segun informashon di e grupo involukrá.
Open Arms a bisa ku dos muhé i seis miembro di famia a wòrdu trasladá pa Malta djaluna. Un hòmber ku problema di salú a wòrdu trasladá pa Italia djadumingu.
E grupo di yudansa a informá ku su boto no a haña pèrmit pa ankra na un haf europeo, 12 dia despues di a reskatá 123 inmigrante den Laman Mediteráneo. E tripulashon a salba 39 migrante mas djasabra.
E isla italiano, Lampedusa, ta e haf mas serka. Pero Italia a prohibí yegada di Open Arms i tambe un otro boto di reskate ku bandera noruego ku 251 migrante.
