WILLEMSTAD.- Ayera 18 di mei tabata un dia grandi pa Krus Kòrá Kòrsou. Ta e fecha di aniversario di e organisashon di boluntario mas grandi ku ta eksistí.
Bestür, partnernan, boluntarionan i amigunan di Krus Kòrá Kòrsou a reuní na misa di Fatima na Suffisant djaluna 18 di mei pa un selebrashon di misa. E misa tabata hopi bon bishitá pa tur miembronan di Krus Kòrá Kòrsou.
Vise presidente di Krus Kòrá, sra. Astrid Carolina-Richardson den un diskurso na nòmber di direktiva, a bisa ku e 18 di mei 2026 ta un momentu di orguyo i gratitut pa selebrá un momentu spesial, 95 aña di Krus Kòrá Kòrsou.
E vise presidente a mustra ku ta 95 aña di servisio, 95 aña di kompashon, solidaridat, humanidat i di kompromiso ku komunidat.
Durante tur e añanan aki Krus Kòrá, a hunga un ròl esensial den bida di hopi hende, brindando, asistensia nèt na e momentunan di mas difísil den nan bida. Den momentonan di krísis, nesesidat i den situashon di emergensia, Krus Kòrá a keda un pilar di speransa i apoyo. E trabou di Krus Kòrá no ta solamente importante, e ta simplemente nesesario.
Sra. Carolina-Richardson a duna honor i balor na e grupo di boluntarionan di e organisashon. El a gradisí nan pa nan sakrifisio. Danki ku nan ta dispuesto na bandoná nan kas pa duna aporte na komunidat. ‘Yuda hende di kurason no ta algu ku bo ta siña na skol; e sentimentu ei mester sali di kurason.”
Manera e movementu mundial di Krus Kòrá a kuminsá su historia den 1859 ku Henry Dunant, asina tambe Krus Kòrá Kòrsou a sigui ku e prinsipio na duna servisio na komunidat. No ta importá koló, rasa ni religion, Krus Kòrá semper ta kla pa yuda. E spiritu ei ta e mesun ku nos ta keda sostené te awe; yuda sin distinguí i sirbi ku kurason.
Tambe a para ketu pa rindi rèspèt na tur miembronan di Krus Kòrá ku a fayesé, spesialmente na Henky Stomp, baluarte grandi di Krus Kòrá ku nan a hiba pa su último lugá di sosiegu apénas algun dia pasá.
E vise presidente a finalisá ku palabranan bunita dirigí na tur boluntario di Krus Kòrá i a kòrda tur hende ku awor Krus Kòrá ta rumbo pa 100 aña.
