Eks-presidente Boliviano Jeaninez Anez ta zuai ku bandera despues ku el a bandoná e prizòn Miraflores na La Paz. Korte a eliminá e kastigu di 10 aña kontra di su persona.
LA PAZ, Bolivia (AFP).- E eks mandatario di Bolivia Jeanine Añez a bandoná prizòn di La Paz ayera despues di tabata será pa mas ku kuater aña i mei pa un supuesto gòlpi di estado. E sentensia awor a keda anulá.
Añez, abogado di 58 aña, a kai será den 2021 i kondená e siguiente aña na 10 aña di prizòn pa e delito di “resolushonnan kontra di lei”, den un kaso durante kua a akus’é di asumí ilegalmente presidensia dje pais despues di e renunsio di Evo Morales den 2019.
E polítiko di derecha ayera tardi a keda risibí pa su famianan i siguidónan. “Nunka lo mi arepentí di a sirbi mi pais”, segun el a bisa na bos haltu den porta dje prizòn.
Despues di elekshonnan di 2019 den kua Evo Morales a keda reeligí meimei di akusashon di froude, e pais a hundi den un krísis sosial, ku masha hopi protesta. E lider kokalero a renunsiá. Añez, na e momento ei parlamentario i visepresidente di Senado, a asumí e poder den novèmber di 2019 den un seshon ku no a konta ku partisipashon di e partido di gobiernu. El a goberná te ku 2020, aña den kua el a keda relevá pa e iskierdista Luis Arce.
“Nunka tabatin un gòlpi di estado. Loke tabatin ta un froude elektoral pa kua nos tur komo Boliviano a sali dilanti pa reklamá pa na respetá nos votonan”, segun e eks-mandatario.
