MEXICO (AP).- Outoridatnan a deskubrí un tùnel di 230 meter largu bou di e frontera di Sonora, Mexico, pa Arizona, Merka, i ku a wòrdu usá pa hiba droga teritorio merikano, asina Sekretaria di Defensa mèksikano a informá ayera.
E pasashi bou di tera a kuminsá den e parti tras di un negoshi di benta di eis i awa purifiká yamá ‘Iceland’ ku a anunsiá su próksimo apertura, na San Luis Río Colorado, Sonora, i a kaba den e instalashonnan di e otro negoshi na Arizona, asina a informá.
General Raúl Güereca a bisa ku e tùnel, deskubrí djasabra, a wòrdu konstruí na 18 meter di profundidat i tabatin un haltura di 1,30 meter.
E tabatin instalashonnan eléktriko, ventilashon i garoshinan pa transportá e pakinan di droga, asina e Sekretaría a informá.
