…Carl Eric Rinsch lo por kai será pa algun dékada si hañ’e kulpabel…
LOS ANGELES, USA (AFP).- E direktor Carl Erik Rinsch, kende a filma esenanan di un serie di ‘science fiction’ na Brasil i Uruguay, a keda detené na Los Angeles akusá di a malversá 11 mion dollar destiná inisialmente pa e kostoso produkshon di Netflix ku nunka a bira realidat, segun outoridatnan a informá.
Di akuerdo ku e akusashon formulá na New York, e sineasta norteamerikano, ku a dirigí “47 Ronin: E leyenda di samurai”, a risibí e fondonan di un plataforma di streaming entre 2018 i 2020 pero a usa e sèn den invershonnan personal.
Rinsch a keda akusá pa hustisia norteamerikano di froude, labamentu di plaka i transakshonnan finansiero derivá for di aktividatnan ilegal, i a keda detené na West Hollywood.
E akusashon no a referí na Netflix di forma direkto, pero e plataforma di streaming tabatin un disputa ku e direktor pa realisashon di un serie di science fiction ku inisialmente tabata yama “White Horse”.
Aña pasá un mediadó hudisial a determiná ku Rinsch, di 47 aña, tabata debe Netflix den kareda di 9 mion dollar na daño i perhuisio.
Carl Rinsch lo a hòrta mas ku 11 mion dollar di un plataforma destaká di streaming pa finansiá su kompranan luhoso i invershonnan personal en bes di kompletá un seri di televishon ku el a primintí”, segun direktor athunto di FBI, Leslie Backschies.
Den kaso di keda deklará kulpabel, Rinsch lo por pasa algun dékada den prizòn.
