Ta konosí ku rònt México ta topa ku tur tipo di arma di kandela. Segun outoridatnan ta konfiská esakinan, mas ta sigui drenta e pais.
CIUDAD DE MEXICO (AFP).- Outoridatnan mehikano ayera a anunsiá e detenshon di un siudadano femenino norteamerikano akusá di ta suministrá arma na trafikantenan di droga. Ehérsito i fiskalnan ta relashoná e señora ku un grupo ligá na Cártel de Sinaloa, un di e organisashonnan kriminal mas violento dje pais i ku ya pa dos aña ta den un guera interno, ku míles di morto. Segun outoridatnan, e mayoria di armanan konfiská na esenanan di krímen na México ta prosedente di Merka .
For di despues ku e presidente Claudia Sheinbaum a yega na poder den 2024, kasi 30.000 arma di kandela a keda konfiská na México. E muhé detené a keda identifiká komo Yanet N. (lei mehikano ta prohibí pa divulgá fam di akusadonan).
Den e operashon ku a kondusí na su aresto, a konfiská tambe 5.400 kashi di bala i un vehíkulo.
Den 2021, gobièrnu mehikano a presentá un demanda na Merka kontra fabrikantenan di armanan di kandela dje pais, kualnan a keda akusá di ta kontribuí na violensia kriminal. E keho ei a keda rechasá den yüni di 2025 pa Korte Supremo.
Otro denunsiá presentá den 2022 dilanti korte dje estado merikano di Arizona kontra di sinku distribuidor di arma ta aktivo i pendiente di resolushon.
Sheinbaum a multipliká su operashonnan kontra di narkotráfiko bou di preshon di presidente di Merka Donald Trump, kende ta konsiderá ku ta gruponan di droga ta goberná den México i a menasá di aktua si e no mira resultadonan. E mandatario mehikano a rechasá e ponensia ei i ta rechasá firmemente kualke envolvimentu ekstranhero na México.
