HOUSTON, TEXAS.- Un muhé a keda detené na Texas, aparentemente pa motibu ku el a lansa gritunan rasial i menasá e hues federal di koló ku ta na kabes di e kaso kontra èks presidente Donald Trump pa konspirashon den intento pa kambia resultado di elekshon na aña 2020. T’asina ku dia 5 di ougùstùs último Abigail Jo Shry a laga un mensahe telefóniko na e ofisina di e hues Merikano, Tanya Chutkan ku a inkluí menasanan kontra su bida, di akuerdo ku un denunsia ku a ser entregá dor di un agente di e Departamento di Seguridat Nashonal.
E muhé di 43 aña di edat bibá na Alvin, Texas, a yama Chutkan un “katibu pretu estúpido”, i agregando ku “nos tin bista riba bo, i nos ta bai mata bo”, di akuerdo ku e dokumento entregá na korte federal. “Si Trump no ser eligí na 2024, nos ta mata bo, pues bai ku kuidou”, asina e muhé a deklará agregando ku e famia di Chutkan tambe ta na peliger.
Mas aleu Shry tambe a lansa menasa kontra tur otro hende ku lo trata di persiguí i husga Trump, menshonando nòmber di e legislador di koló Sheila Jackson Lee di Texas. Pero debí na e kantidat di menasa i e denunsia ku tin, un hues a ordená pa detené Shry i trese ante un korte penal. Te awor Trump ta enkabesando e bataya komo kandidato Republikano pa e elekshon di 2024, pero na mes momentu e ta konfrontando no ménos ku kuater kaso kriminal.
E hues federal Chutkan (61) a keda asigná pa atendé e kaso di Trump pa denunsianan di konspirashon pa kambia resultado di elekshon, kual el a pèrdè kontra Joe Biden.
