WASHINGTON, USA (AFP).- E yerno dje lider di kartel mehikano Jalisko Nueva Generación (CJNG) a keda detené na Merka, despues ku el a fingi su mes morto.
Segun dokumentonan hudisial norteamerikano, Cristian Fernando Gutiérrez-Ochoa, di 37 aña, a kuminsá traha pa CJNG, un dje kartelnan di droga mas violento di Mexico, den 2014. El a kordiná personalmente na Mexico e transporte i distribushon di 40.000 kilo di metanfetamina i komo 2.000 kilo di kokaina, destiná pa Merka kaminda e ta biba ku abundansia di rikesa.
Gutiérrez-Ochoa den 2021 a sekuestrá dos miembro di Kuerpo Militar di Mexico den un intento pa fòrsa liberashon di e kasá di su suegro, Nemesio Oseguera Cervantes alias “El Mencho”, kende a keda arestá pa outoridatnan dje pais.
Despues di tabata keda buská na Mexico, Gutierrez-Ochoa a hui pa Merka, kaminda el a biba bou di identidat falsu i a hiba un bida luhoso den su kas na Riverside, parti wèst di California.
Segun hustisia merikano, “El Mencho” lo a yuda den Gutierrez-Ochoa su plan pa fingi su mes morto bisando su sosionan ku el a mat’é pa motibu di mentiranan. Esaki a yuda ku e por a filtra drenta Merka pa ta huntu ku yu di “El Mencho”.
Gutierrez-Ochoa ta kore riesgo di un kastigu mínimo di 10 aña di prizòn i un máksimo di kadena perpetuo.
