WILLEMSTAD.– Minister di Enseñansa, Siensia, Kultura i Deporte (ESKD) sr. Sithree van Heydoorn a tuma e desishon pa ekstendé medidanan relashoná ku kalor na skol te ku 4 òktober 2024.
E medidanan ta relashoná ku e situashon klimatológiko ku nos ta aden. Esaki ta nifiká ku medidanan ku a keda instruí den e karta anterior fechá 11 sèptèmber 2024, ta keda vigente.
Manera ta konosí ku den un karta fechá 11 di sèptèmber Minister Sithree van Heydoorn a splika ku ta sigui e reglanan aprobá pa Ministerio di ESKD i konforme e ‘richtlijnen’ di Ministerio di Salubridat Públiko, Medio Ambiente i Naturalesa. Na momento ku Servisio di Meteo anunsiá kódigo hel, direktivanan di skol huntu ku skolnan por tuma medida.
Den e karta minister ta bisa ku relashoná ku e ola di kalor ku tin na e momentu aki, i ku bista riba salú i bienestar di tantu alumnonan komo trahadónan, ministerio enseñansa ta hasi un apelashon riba tur direktivanan di skol pa tuma e medidanan nesesario.
P’esei e ta hasi un petishon na nan pa tene kuenta ku e liña di maneho di ministerio di salubridat (GMN) den e periodo aki.
Pa Enseñansa di Fundeshi ta konta ku skolnan ta sera 12 or di mèrdia. Pa skolnan avansá, lèsnan mester bira 30 minüt, en bes di 45 minüt.
