A eliminá ‘wegenfonds’ i infrastruktura ta sufri

Anthoy Godett: Kon por a konkluí pa eliminá e fondo ei

 

WILLEMSTAD.- Tin algun bon desaroyo na kaminda pa Westpunt. A pone lus i a drecha vários kaminda. Playa Piskadó tambe ta hopi bon, sinembargo ta lamentabel ku a eliminá ‘wegenfonds’. E fondo aki tabata risibí sufisiente sèn tur aña pa asina por a kubri e gastunan di un bon infrastruktura ku ta asina nesesario aki na Korsou. Na palabra Anthony Godett, eks miembro di Konseho Insular di teritorio insular di Korsou i eks diputado di Bestuurscollege di Korsou, den deklarashon na EXTRA.

Siman pasá e situashon di tráfiko na Sta.Rosa a bira algu mas kaótiko ku normal i esei a pone ku asta esnan ku normalmente no mester pasa den e kataklismo ei a bai pone atenshon na dje. Un di e splikashonnan ku bosero di Obra Públiko a duna siman pasá ta ku no tabatin fondo i ta awor gobièrnu ta hasiendo esfuerso pa reuní fondonan pa asina atendé ku e atraso ku tin pa loke ta trata trabounan di infrastruktura. Relashoná ku esaki EXTRA tabata den kontakto ku Anthony Godett kende ta e diputado ku na 1999 a introdusí ‘wegenfonds’. Godett a duna di konosé ku den e tempu aya a fia 40 mion florin pa drecha kayanan di Korsou. Tur aña di nobo e fondo tabata haña alrededor di 40 mion florin ku ta bini di outomobilistanan ku ta paga nan ‘motorrijtuigenwegenbelasting’ manera e yama ofisialmente. Den boka di pueblo ta bisa ‘paga number di outo’.

E eks diputado a sigui splika ku tur sèn ku paga pa number di outo tabata bai direktamente riba e kuenta di banko di ‘wegenfonds’. Nan tabatin un ofisina den edifisio di DOW ku nan propio trahadónan. Despues nan a muda pa e edifisio di Kadaster. E fondo a keda eksistí te poko tempu pasá na momentu ku a disolvé. Bou di eks minister Balborda (PNP) a kuminsá e trámitenan pa disolvé i na 2018 a eliminá ‘wegenfonds’ por kompletu.

Tur plaka di e impuesto di kaya ta bai den fondonan general di gobièrnu i komo tal ta bira difísil pa aloká fondonan ku e frekuensia nesesario pa kumpli ku proyektonan di infrastruktura, sigur den e situashon finansiero delikado di último añanan.

Godett te ainda no por komprondé kon por a yega na e konklushon pa eliminá e fondo mirando e importansia di bon infrastruktura. Godett ta kere ku awendia mester kambia e sistema pa logra mihó kobransa di e impuesto. E ta na altura ku awor aki na desèmber 2019 ainda lo tin hopi outomobilista ku no a kumpli ku ni e prome mitar aña di 2019. Danki na e sistemanan moderno tantu OW, seguro i Ontvanger sa kua vehíkulo no a paga. Mester di mihó kontròl pa atendé ku e situashon aki, asina Godett a terminá. Pa loke ta trata e punto trese pa e eks diputado ku ainda hopi hende no a paga number di outo EXTRA a buska kontakto ku Ontvanger sr. Trona kende a splika ku e pago di outomobilistanan a bai bon pa loke ta trata e prome mitar di 2019.

 

SHARE

LEAVE A REPLY