Na luna di yanüari e abitantenan di Groenland a tene un akshon di protesta despues di a tuma nota di Donald Trump su intenshon pa poderá dje isla.
KOPENHAGEN, Dinamarka (AFP).- Merka, Dinamarka i Groenland awe lo firma un akuerdo anunsiá siman pasá riba seguridat dje isla, djis promé ku e Asamblea General di Nashonnan Uní na New York.
Na komienso dje aña’kí e presidente norteamerikano, Donald Trump, a provoká un krísis ku su aliadonan na Europa ora ku el a menasá di tuma e teritorio outónomo danes di Ártiko (Noordpool), un posishon stratégiko ku ademas ta riku na rekursonan. Siman pasá Trump a anunsiá un akuerdo, di kua su kontenido presis no ta konosí. E akuerdo lo keda firmá pa Trump, tambe e Promé Minister di Groenland, Jens-Frederik Nielsen i Promé Minister danes, Mette Frederiksen, den edifisio di Nashonnan Uní.
Trump a duna di konosé djabièrnè ku e teksto ta duna su pais e “kontròl permanente” riba seguridat di Groenland i e Departamentu di estado a indiká ku lo e prohibí e instalashon di basenan ruso i chines riba e isla.
E Promé Minister danes, Frederiksen, a deklará ayera na medionan i prensa dje pais ku e akuerdo “ta rekonosé” e soberania di e reino i e derechi di e pueblo di Groenland riba outodeterminashon.
Segun Trump, siman pasá den e negosiashonnan a yega na un akuerdo ku ningun pais atversario di Merka por realisá invershonnan den sektornan sensibel na Groenland sin konosementu norteamerikano.
