CIUDAD DE MEXICO (AFP).- Outoridatnan mehikano a haña kuater kurpa den un pos serka di e kapital mehikano i a analisá si dos di nan ta korespondé na un pareha norteamerikano ku a disparsé kasi un luna pasá. Ekspertonan forensiko ta eksaminá e kadavernan hañá den un pos den un zona di mondi djis serka di Ciudad de México. Nan a mira Zafar Padamsee Mawani i Guillermo Jafett Hidalgo pa último biaha dia 20 di mei. E pareha a muda for di Chicago pa un suburbio di México.
Medionan di prensa a indiká ku tabata djárason ku a deskubrí e restunan mortal durante di un operashon di búskeda di polis den e mondi di La Marquesa den estado di México. Outoridatnan ta sospechá ku dos di nan ta korespondé na Mawani i Hidalgo, ku tambe tabatin nashonalidat mehikano.
Prensa lokal a reportá ku famianan a detektá movementunan riba nan kuentanan bankario despues di e desaparishon. E otro kurpanan lo ta di kenianonan, segun e korant La Jornada. Den e estado di México ta biba vários koredó di máratòn dje pais.
