KRALENDIJK — Djabièrnè mainta a trata kaso di Raysley Sambo pro forma, kende ta akusá di a mata e dama mèksikana Adriana Morales de Florencio, tripulante di barku krusero Navigator of the Seas.
Esaki a sosodé entre 20 i 28 aprel di e aña aki. Hues Paulides i fiskal Starrenburg i e dos abogadonan a deliberá riba algun aspekto i a pone un fecha kaminda ta bai trata e kaso den su profundidat.
Tambe tabatin algun persona mas den sala di Korte, entre nan pastor di e iglesia kaminda e akusado tabata bishitá. Hues a pasa palabra pa fiskal kende a menshoná ku tin tres akusashon riba e akusado, unu ta posishon di arma, mata e dama i der’é.
Hues a mustra ku tin diferente investigashon mas ta tumando lugá en konekshon ku e kaso, entre otro a topa ku no ménos ku 840 video di pornografia di mucha ku e akusado a download den su laptop.
Tur esaki mester kontinuá i lo forma parti di tratamentu di e kaso. Tambe ta bai skucha 2 testigu promé trata e kaso na luna di novèmber. Aparte di Anthony Nicolaas tin un abogado mas, pues ta trata di 2 abogado ku ta bai defendé e akusado.
Abogadonan a keda sorprendé pa e asuntu di pòrno riba e laptop di e akusado i tambe ku ta bai papia ku dos testigu. Tur esakinan e akusado no a papia di dje ku su abogadonan. Informashon no ofisial ku Extra ta disponé di dje ta ku Raysley tabata na pia di Waf di Sùit i tabata einan kende el a mira e dama i a kuminsá kombersashon kuné loke a resultá den un kaso kruel mas despues.
No tabata planiá adelantá pa nan a topa, sino simplemente e dia ei nan a papia i Raysley di un òf otro forma a kombensé e dama pa bai kuné. Dia 2 di novèmber ta trata e kaso den su kontenido pa 10’or di mainta. Riba potrèt momentu ku e akusado a sali for di sala di Korte rumbo pa prison.
