WILLEMSTAD.- ‘Festival di Tumba tabata e punto di agènda den e reunion resien di AMAK kaminda un sala yen a diskutí na un forma sano riba diferente punto’, asina Feco Gomes, presidente di AMAK a kuminsá splika ‘DEN E BEMBE’.
‘A pone reglanan di diskushon i tur hende a mantené nan mes na esaki. Nos a atendé entre otro e partisipashon di Buleria i votamentu riba pantaya’.
Un mayoria grandi a vota pro e partisipashon di bandanan ku no ta di Kòrsou. Ku esaki e diskushon riba partisipashon di Buleria a terminá. Na final dje reunion a instalá diferente grupo di trabou ku lo tin ku bai atendé puntonan di atenshon pa ku Festival di Tumba i trese nan rekomendashon. Ta pendiente pa aki 1 luna bolbe tene un reunion pa dje forma ei e komishonnan hasi nan presentashon.
Feco Gomes tabata kontentu ku e asistensia, ‘Mi tin basta tempu sin mira un sala yen di dilanti te patras. Mi ta spera ku pa e próksimo reunion lo tin un asistensia asin’aki i ku e miembronan lo tin un aktitut positivo manera e biaha aki’, asina Feco a terminá   bisando.

LAGA UN KOMENTARIO

Please enter your comment!
Please enter your name here