Momento ku personal dje prizòn Pococi, na Costa Rica, tabata liberá e pushi for dje pakinan di droga ku tabata di teip na su kurpa.
SAN JOSE, Costa Rica (AFP).- Wardadónan di prezu di un prizòn na Costa Rica a kue un pushi ku den oranan di anochi tabata drenta prizòn ku droga mará na su kurpa. E animal tabatin pakinan chikitu di 235 gram di mariwana i 67 gram di crack, lorá den tela i di teip na su kurpa, segun Ministerio di Hustisia.
E informashon ofisial ta bisa ku “agentenan dje prizòn di Pococi a logra na reskatá un pushi ku tabatin dos pakete di droga pegá na su kurpa”.
Un video kompartí pa e minister ta mustra un wardadó di prezu ta hasi esfuerso pa por kue e pushi di koló blanku ku pretu via di hèkwèrk.
Despues por mira e animal riba un mesa den e prizòn kaminda ku tabata kita e pakinan di droga for di su kurpa.
“Danki na akshon rápido dje wardadónan di prezu ku a logra kue e pushi i kita e paketenan pa esakinan no yega serka e prezunan”, segun e ministerio a duna di konosé.
