Un enfermera ta inyektá e promé bakuna kontra di Ebola Sudan na un boluntario na e hospital Mulago Referra, na Kampala.

GINEBRA (AFP).- E akshon di bakuna kontra di ébola a kuminsá ayera na Uganda, ménos di un siman despues ku outoridatnan a anunsiá kasonan nobo dje enfermedat, segun Direktor General di Organisashon Mundial di Salú (OMS), Tedros Adhanom Ghebreyesus.
“E seshon akí di bakuna a keda hasí den tempu rekòrt, garantisando na mes momento e kumplimentu di tur e rekesitonan reglamentario i étiko nashonal i internashonal”,segun e responsabel di OMS.
E seshon akí ta dirigí na “kontakto di personanan ku e enfermedat i kontakto di e kontaktonan akí”, segun Ghebreyesus.
E responsabel di OMS a asentuá ku ta trata dje “promé ensayo pa evaluá e efikasia klíniko di un bakuna kontra e enfermedat dje virus ébola-Sudan”.
Dia 30 di yanüari, outoridatnan ugandes a anunsiá un brote di ébola, un keintura hemorágiko viral i hopi biaha mortal, na Kampala, kaminda e enfermedat a kousa morto di un enfermero di 32 aña ku tabata traha den e hospital nashonal Mulago”, segun e sekretaria permanente dje Minister di Sanidat, Diana Atwine.
Ebola ta keda transmití via di líkidonan di kurpa humano i e síntomanan prinsipal ta keintura, sakamentu, sangramentu i diarea. Personanan infektá ta bira kontagioso te ora ku e síntomanan aparesé, depues di un periodo di inkubashon ku ta varia entre 2 i 21 dia.
E vírùs akí a kousa mas di 15.000 morto na Afrika for di aña 1976.

LAGA UN KOMENTARIO

Please enter your comment!
Please enter your name here