CIUDAD DE MEXICO (AFP).- Rosalinda Gonzalez, kasá dje lider di e poderoso Cartél Jalisco Nueva Generación a keda liberá ayera for di un prizòn den sentro di Mexico.
Rosalinda, pareha di Nemesio Oseguera, alias “El Mencho”, a keda kondená na sinku aña di prizòn pa a realisá operashonnan ku plaka optené di forma ilegal den su papel komo operador finansiero dje violento kartel, un di e ochonan ku Merka siman pasá a designá komo organisashonnan terorista estranhero.
Su liberashon a kai pareu ku e entrega na Merka di 29 di e mas notorio narkotrafikantenan di Mexico.
Un fuente hudisial a konfirmá pa AFP ku for di djaweps tabatin programá un oudiensia hudisial den e prizòn pa disidí riba e liberashon di Gonzalez, esei pa motibu di bon komportashon i pa a kumpli ku mas di mitar di su kondena.
Imágennan dje kadena lokal N+ a mustra e momento ku e señora tabata bandoná prizòn kompañá pa su abogado, i a drenta un outo luhoso miéntras e tabata keda siguí pa kámaranan di algun reportero presente na e sitio.
González a keda arestá den un bario di Guadalajara, e kapital dje estado di Jalisco, den novèmber di 2021.
Su partner Nemesio Oseguera ta un dje narkotrafikantenan mas buská pa Merka ku ta ofres’é 15 mion dòler pa su kaptura.
