Un bandera kolombiano ku logo di FARC ta waya na e siudat di Suarez, departamento di Cauca. Ketu bai èks-miembronan di FARC ta demostrá nan poder rònt Colombia.
BOGOTA (AFP).- Un grupo di 45 militar a keda liberá ayera despues di tabata un dia retené den un zona kontrolá pa rebeldenan disidente di èks-FARC den zùitwèst di Colombia, kaminda un dia promé a laga 27 militar bai.
Algun shen hende di pueblo a retené 72 militar ku tabata tuma parti na un operashon den Cañon del Micay, un enklave pa produkshon di kokaina kargá ku kultivashon narko i sentro di operashon di rebeldenan ku a apartá nan mes dje históriko akuerdo di pas di 2016 entre gobièrnu i FARC.
Ehérsito a logra pa saka 27 di nan djadumingu i ayera Ministerio di Defensa a informá e liberashon di e sobrá 45. A trasladá e sòldánan pa e siudat serkano di Popayán “ku henter e personal sano i salvo”, segun ehérsito a informá.
Imágennan kompartí pa forsanan militar ta mustra un grupo di sòldá bahando di un helikòpter ku nan tasnan riba lomba. Retenshon di militarnan i polisnan ta frekuente den zonanan di Colombia ku ta keda kontrolá pa gruponan armá i ku masha poko presensia di polis. Outoridatnan ta denunsiá ku e retenshonnan ei ta konta den su mayor parti ku kampesinonan riba plantashon di koka, kendenan ta keda manipulá i obligá dor di organisashonnan ilegal.
E presidente Gustavo Petro riba X a pidi e liberashon di tur miembro di forsa públiko ku ta sigui retené den e pais. ”Te na e momento akí tin shete militar sekuestrá dor di sivilnan. Liberá nan awor akí”!
Fuentenan di ehérsito konsultá pa AFP a splika ku e militarnan ei ta den man di diferente organisashon ilegal. Petro den 2024 a start un ofensiva pa rekuperá kontròl di Cañón del Micay, pero a topa ku fuerte resistensia di e komunidat, di kua su eksistensia ta dependé dje kultivo di blachi di koka. Su gobièrnu ta proponé un programa ambisioso di sustitushon boluntario di kultivonan den e regionnan aki i otro regionnan di koka dje pais pa remplasá e ekonomia di narkotráfiko.
