Pòpchinan “Super-Bigote” i “Cilita” kualnan ta referí na e pareha presidensial ku ta detené aktualmente na Cuba.
CARACAS (AFP).- Merka a mata 55 militar kubano i venezolano durante dje atakenan ku a kondusí na kaptura di Nicolas Maduro den Caracas, segun sifranan di ámbos pais. Venezuela a mantené un hermetismo riba e saldo di víktimanan den e operashon ordená pa Donald Trump, i te ku ayera tardi lat no tabatin un balanse ofisial venezolano. La Habana ayera a publiká un lista ku nòmber di 32 militar kubano kendenan a muri na Caracas. Un dia promé, Venezuela a publiká akto fúnebre di 23 sòldá, ounke ta kalkulá ku e kantidat ta muchu mas haltu.
Tampoko ta konosí e saldo di sivilnan ku a muri. AFP a konfirmá e morto di un señora di 80 aña den e bombardeonan. Un grupo di médiko na Venezuela ta kalkulá un saldo di 70 morto i 90 herido.
E presidente nobo, Delcy Rodriguez, ta goberná bou di preshon pa kumpli ku e demandanan fuerte di Merka i pa reakomoda chavismo sin Maduro.
“E meta prinsipal ta pa gana tempu pa konsolidá awor ku sa ku e demandanan i kondishonnan di Washington lo ta relashoná ku e tema petrolero, loke tambe lo tuma su tempu”, segun e analista polítiko Mariano de Alba.
Chavismo ayera a realisá un “marcha di hende muhé” pa pidi e liberashon di Maduro i su kasá Flores. A konvoká manifestashon pa tur dia for di djasabra. Algun shen militar ta tuma parti na e protestanan, inkluyendo e poderoso dirigente Diosdado Cabello.
“Esnan ku awe ta hari di nan mes desgrasia, kendenan ta bisa ku a bai ku Nicolas i ku awor e revolushon ta basha den otro, nan no konosé e pueblo aki”, segun Cabello a deklará na komienso dje marcha. Cabello ta keda na su puesto den e gobièrnu nobo,meskos ku Vladimir Padrino, kende ta e minister di defensa.
“Delcy mester drumi ku wowo habri awor”, segun e eks-diplomatiko Brian Naranjo, kende tabata number dos di embahada di su pais na Venezuela entre 2014 i 2018 promé ku el a keda ekspulsá pa Maduro.
Marchanan ku partisipashon di míles i míles di hende e dianan aki den Caracas.
