QUITO, ECUADOR, AFP.- E direktor di un prizòn di Ecuador, ku dos siman pasá tabata esenario di un masakre entre prezunan, a muri djaweps den un atentado na Quito, segun informashon di e organismo estatal enkargá ku prizònnan (SNAI).
E èks koronel di polis Santiago Loza “a bira víktima di un atentado mortal”, segun indikashon di e entidat den un komunikado.
Loza, kende a keda asesiná al estilo ‘sikario’ den un bario di Quito, segun medionan lokal, a okupá e puesto di direktor di prizòn riba 9 di novèmber den e kapital ekuatoriano, kual tin alrededor di 1.300 prezu.
Dies prezu a muri riba 18 di novèmber den e prizòn, meimei di un konfrontashon ku a kuminsá despues ku a trasladá prezunan di un prizòn di seguridat máksimo na Guayaquil.
“Nos ta repudiá e echo kobarde aki kometé meimei di un proseso di transformashon kua nos a inisiá komo institushon, pa seguridat i kontròl di tur sentro di privashon di libertat”, asina SNAI a añadí.
Gangnan vinkulá ku narkotráfiko ta hibando un guera di poder paden i pafó di e prizònnan den e pais.
