CHILE, AFP.- Presidente chileno Sebastian Pinera a pone militar den e region sùit di e pais ku ta den konflikto ku indigenanan mapuche, kendenan ta pidi pa nan haña nan tera bèk. E medida ta pa kontené e situashon di violensia.
“Nos ke komuniká awe ku nos a disidí di dekretá estado di eksepshon”, den kuater provinsia di e region sùit di Biobio i Araucania pa asina kontrolá e alterashon grave di órden públiko, asina Pinera a anunsiá.
E mandatario a duna un mensahe ayera na e pais riba da di Rasa òf di hispanidat, ora ku mei mei di polémikanan ku e pueblonan di orígen, Amérika Latina ta konmemorá e yegada di Cristóbal Colon na 1492.
E medida ta inisialmente pa 15 dia, i ta konta pa e provinsianan di Biobio i Arauco,den e region di Biobio i Malleco i Cautin, den Araucania, asina e mandatario a indiká.
E lidernan di mapuche, e tribu chileno ku mas di 1,7 mion entre e 19 mion di chileno ku tin, ta demandá restitushon di nan tera. E falta di solushon di nan reklamonan a provoká un eskalashon di violensia den último dékada, ku atakenan di entre otro sendementu di kandela na lugánan priva i trùknan. Tambe a sali na kla e presensia di retnan di narkotráfiko i di organisashonnan di outodefensa, meskos ku operativonan polisial montá pa tira e falta riba e indigenanan.
