A prolongá detenshon hòmber ku a dal mama i beibi mata

WILLEMSTAD.-Informashon ku EXTRA ta disponé di dje ta indiká ku un ratu pasá a prolongá detenshon di e hòmber ku siman pasá djabièrnè a dal un mama i su beibi di apénas un aña, mata riba Helmin Wiels blvd na altura di Pico Cash & Carry.

Kòrsou a haña un shòk grandi e mainta ei ora ku tur hende tabata na kaminda pa hiba muchanan skol i bai trabou i a bira konosí ku un shofùr lo tabata kore ku un velosidat asina haltu ku na altura di e empresa ku ta bende por mayor a dal un mama di 19 aña i su beibi. Ámbos a muri na e sitio mes. Awe a presentá e hòmber J.O.C di 39 aña dilanti wes komisario ku a prolongá su detenshon ku 8 dia. Den e aksidente horibel ku a tuma lugá a tuma bida di Julianne Maria Joe, nasé dia 15 di novèmber 1999 i Giun-drick Joe, nasé dia 10 di febrüari 2018, ámbos nasé  Kòrsou.

For di investigashon preliminar ku polis a realisá na e sitio, a sali na kla, ku e mama ku na e momento ei tabatin e yu den su brasa a bai krusa kaya, nèt na momentu ku un vehíkulo tabata aserkando, biniendo for di Julianadorp bayendo den direkshon di Otrobanda. Manera indiká, e vehíkulo aki a alkansá ámbos persona. Alrededor di mitar di ocho di mainta, dòkter di polis a konstatá morto di e mama i e yu.

SHARE

LEAVE A REPLY