Tambe a prolongá di 5 sospechoso mas
WILLEMSTAD.- Ayera tardi wes komisario a prolongá detenshon di e pelotero Jonathan Schoop ku 8 dia mas. El a keda detené siman pasá dia 29 di yanüari, i ayera e mester a presentá dilanti di wes komisario i su detenshon a keda prolongá ku 8 dia mas.
Pa loke ta e otro detenshonnan ku tambe a tuma lugá sam sam ku Schoop, algun detenshon tambe a keda prolongá. Di e 9 sospechosonan detené, wes komisario a prolongá detenshon di 5.
Dia 29 yanüari a detené Schoop i 8 persona mas. Durante redada a konfiská vários arma di kandela, munishon, patronchi i lachi.
For di fuentenan hopi yegá ku e investigashon, ta indiká ku ya tin algun tempu kaba ku outoridatnan tabata sigui pasonan di e grupo ku a keda arestá i un otro grupo mas. Pues ta trata di dos gèng kontra di otro.
Aparentemente tin mas sospecho kontra miembronan di e gèng aki, kaminda ku tin kehonan entregá i ku e miembronan di e gèng a paga víktima(nan) hopi plaka pa nan no mester papia. Tin dos aspekto delikado ku a keda menshoná, pero mester duna investigadónan espasio.
Djaweps 29 yanüari den ora di mardugá e tim di opservadó a sigui e grupo aki for di Festival Center i despues na un trùk di pan pa despues realisá entrada hudisial den un kas na Rooseveltweg i tambe den e área di Sta. Maria. Esaki a kondusí na 9 detenshon i konfiskashon di vários arma di kandela i munishon. Manera ariba indiká di e 9 detenshonnan, 5 a keda prolongá.
