WILLEMSTAD.- Den e fin di siman un biaha mas e tim di boluntarionan enkabesá pa Kunuku Man a sali pa ataká un sitio ku nos komunidat ta hasi shushi. E biaha aki nan a bolbe bai na e rotònde di Caracasbaaiweg i Janthiel i aki nan a rekohé komo 241 kilo di shushi. Opviamente a trata di hopi shushi komun ku ta tira for di outo kantu di kaminda, aunke e repartishon ta praktikamente igual ku tur siman na otro sitionan.
Den e akshon di limpiesa aki nan a rekohé 665 bòter di serbes, ku a pisa 133 kilo i ku a bai pa banko di glas; tambe 300 bleki di aluminio, ku a pisa 4 kilo; tambe 400 bòter i otro artefaktonan di plèstik ku en total a pisa 13 kilo ku tambe a bai pa resiklahe. Finalmente loke a keda atras na shushi komun tabata 90 kilo. E total na shushi ku a rekohé tabata di 241 kilo. Un apelashon atrobe riba tur siudadano pa stòp di tira kos for di bentana di outo, i hendenan ku ta transportá shushi, kubri e shushi ku tapol sino un parti a keda bula na kaminda i shusha mesun kos atrobe.
