ROMA, ITALIA (AFP).- Wardakosta italiano a anunsiá ayera di a rekuperá 12 kurpa mas, despues ku mas di 60 persona a keda reportá di a disparsé despues ku un barku ku migrantenan a senk dilanti kostanan zùit dje pais. Diesun persona a sobrebibí e tragedia, ku a tuma lugá djaluna mardugá dilanti e kostanan di Calabria, parti zùitwèst di Italia.

Entre esnan ku a pèrdè nan bida ta figurá 26 mucha, algun di nan di apénas poko luna di bida, segun “Dòkternan sin Frontera”, ku a yuda esnan ku a sobrebibí.

Por lo ménos 10 kadaver a keda hañá djaluna riba otro barku di migrante ku a noufragá dilanti dje isla italiano Lampedusa, segun e grupo di yudansa aleman ResQship.

Den kareda di 3.155 migrante a muri òf disparsé den laman Mediteráneo aña pasá ora ku nan a purba yega Europa, segun Organisashon Internashonal pa Migrashon.

E mesun organisashon a indiká ku mas di 1.000 migrante a muri òf disparsé den Mediteráneo for di kuminsamentu dje aña’ki.

E ruta Mediteráneo sentral ta un dje trayektonan migratorio mas peligroso di mundu i un 80% di mortonan registrá den e laman ei a muri den e zona aki. Hopi migrante ta subi embarkashon den mal estado for di Tunesia òf Libia, ku e speransa di yega Italia.

LAGA UN KOMENTARIO

Please enter your comment!
Please enter your name here