REMEDIOS, Colombia (AFP).- Trahadónan di reskate despues di un operashon di 12 ora di búskeda a liberá 18 trahadó kende tabata atrapá den un mina di oro den nortwèst di Colombia despues ku parti dje mina a basha’den,
“A haña nan tur i nan tabata den bon estado di salú”, segun Agensia Nashonal di Mina. E trahadónan a sali un pa un for di un buraku grandi i a topa ku famianan ku tabata para warda riba nan.
“Nos tur ei den tabatin nèrvio, pasobra nos tabata pensa: ‘Nos lo sali òf nos lo no sali’”, segun Ferney Jaramillo, un dje mineronan ku a keda reskatá. Segun outoridatnan lokal, e trahadónan a keda 18 ora atrapá.
Aksidentenan den mina ta algu komún na Colombia i ku frekuensia ku pèrdidá di bida, spesialmente den minanan di karbon.
Aña pasá,124 persona a pèrdè nan bida den situashonnan similar i pa loke ta bai 2025 e sifra ta di 65, segun datonan ofisial.
Jaramillo a relatá ku despues di oranan di insertidumbre, skuchando e trahadónan di reskate na e otro banda dje tùnel, esei a yena nos ku “un emoshon nèrvioso”.
E promé mineronan a kuminsá sali den kareda di 1or i e operashon a kulminá dos ora despues.
E trahadónan na ningun momento a pèrdè aire. Nan tabatin un ‘generator’ di oksígeno ku a sigui den funshon despues dje aksidente.
E zona aki di Antioquia tin un tradishon fuerte di mina. E oro saká di forma ilegal sa keda usá pa finansiá gruponan armá manera Clan del Golfo, e kartel prinsipal di tráfiko di droga na Colombia.
Por lo ménos 130.000 persona ta traha den minanan ilegal na Colombia, segun sifra di Ministerio di Mina i Energia.
