Famianan ta sinta warda pa e restunan mortal miéntras ku instituto nashonal forénsiko ta okupá ku e trabounan di identifikashon dje kurpanan.
SANTO DOMINGO.- E balanse final dje kantidat di morto den e niteclub Jet Set na Santo Domingo a yega na 221. Esei segun presidente dominikano a informá ayera, miéntras ku ta kaba di atendé ku outopsia pa por entregá e delaster kadavernan.
E saldo ta kuadra ku e delaster boletin di outoridatnan, i ku a inkluí 189 persona reskatá ku bida entre e loke a sobra dje edifisio.
E dak a basha den otro den mardugá di 8 di aprel, durante konsierto dje popular kantante Rubby Perez, kende tambe a pèrdè su bida.
Outoridatnan a instalá áreanan nobo kaminda ku famianan por keda, pendiente pa tende di nan famianan. Tur e áreanan ta kargá ku hende, sperando riba resultado di outopsia.
“Nan a entregá nos un kurpa ku no ta di dje”, segun Julio Alberto Acosta kende a pèrdè un yu di kriansa den e tragedia, “Nan a entregá nos un saku i a bisa pa habri i wak aden, a resultá ku no t’e. “Nos ke haña esun di dje mes, pa su mama mir’é i pa nos por dera”, el a agregá.
Gobièrnu a informá ku a kontratá 12 dòkter patólogo forense pa e trabou di identifikashon por kana mas lihé.
“Ningun hende no ta keda sin identifikashon i ningun hende lo no keda sin kontesta”, segun e minister di salú, Victor Atallag. “Nos lo move e delaster piedra ku mester move”.
Gobièrnu a anunsiá ku a lanta un komishon di ekspertonan nashonal i estranhero pa determiná e kousanan di loke ta konsiderá komo e tragedia di mas grandi di último añanan den e pais karibense.
E alkalde dje kapital Distrito Nashonal a sòru pa seis kas funerario risibí 170 kaha di morto di forma grátis.
A traha un área dilanti dje zona di desaster i esaki a yena ku flor, bela i mensahenan. “Pais ta di luto”, segun presidente Abinader a duna di konosé.
