…..a honra Nemensio Chi Domitilia
WILLEMSTAD.- Ayera nochi a sende lusnan di Pasku na Rotònde Sta Rosa. Awor aki ta iluminá i ta trese e ambiente di Pasku den barionan di pariba.
E aña aki ta kumpli 7 aña ku di e inisiativa pa hasi Bándariba tambe kontentu den temporada di fin di aña. Bándariba tabata manera lubidá, i a disidí ku rotònde Sta Rosa tambe mester haña un ambiente di lus, di forma ku abitantenan di Bándariba, pero tambe tur esnan ku ta bishita Bándariba, sinti e ambiente di fin di aña.
Despues di 5 aña, aña pasa a krea algu nobo aserka, i a dediká e dekorashon na un baluarte di Bándariba kende ta Sr Lipo Elhage (qepd).
E aña aki e fundashon di típikonan a bin ku e petishon pa honra Nemencio “Chi” Domitilia, kende tabata tokadó di mandolin di típiko Sta Rosa, i un persona hopi konosí den Santa Rosa, ku a siña hopi hóben e tempu ei toka Mandolin.
A logra kristalisá e deseo aki i alabes sende lusnan di Pasku na e Rotònde di Sta Rosa.
Esaki a bira posibel entre otro ku yudansa di ministerio di VVRP den persona di e Minister Sr Charles Cooper, por bisa ku e aña aki Bándariba a haña su dekorashon.
Riba e fotonan momentu ku a sende e lusnan di Pasku i tambe Típiko Pasa Bon deleitando tur presente.
