WILLEMSTAD.-E karta di direktorado di aviashon ku e titulo “Closure of Airport Hato in Curaçao for inbound passengers from All Countries” ta kreando hopi konfushon. Hendenan na Ulanda i otro partinan di Oropa ku sea ta ku fakansi of pa negoshi i tambe hendenan na otro paisnan ta bastante preokupá. Asta presidente di Kámara di Komersio Billy Jonckheer den deklarashon na EXTRA a enfatisá esaki indikando ku nan tambe ta hañando reakshon di tur parti riba e karta aki. Jonckheer a informá ku ta buskando kontakto ku gobernantenan pa papia riba esaki.

Manera EXTRA a informá kaba e karta di direktorado di aviashon ta indiká bon kla ku ‘The Hato Airport in Curaçao will remain closed for All Inbound passengers from All Countries except for the stated exemptions”. Tin un lista di paisnan di riesgo mediano i otronan di riesgo abou ku si ta permití pa drenta Kòrsou. E lista di paisnan di rísiko mediano ta Ulanda, Cuba, Alemania, China, Canada etc. E paisnan ku ta riba e lista di rísiko abou ta entre otro Boneiru, Barbados, Anguilla, Dominica, Jamaica, Saba, Statia, St. Barths i algun otro mas. Mas detaye den edishon di EXTRA.

 

A sera aeropuerto Hato pa pasahero tur pais

Tin eksepshon pa pasaheronan por drenta Kòrsou

WILLEMSTAD.-Basa riba un desishon fechá 14 ougùstùs 2020 di0 gobièrnu di Kòrsou, Aviashon Sivil a anunsiá ku a sera aeropuerto di Kòrsou te próksimo aviso. Asina un karta di Leslie Laplace, direktor di e direktorado di aviashon dirigí na tur operadó i kompanianan di aviashon ta splika. A sera aeropuerto Hato pa tur pasahero for di tur pais.

E desishon menshoná di 14 di ougùstùs 2020 ta remplasá e desishon anterior di 12 di ougùstùs 2020. Tur avion por baha na Kòrsou, i tin eksepshon di pasaheronan ku por drenta pais. Na prome lugá e ta konta pa pasaheronan ku ta bini for di paisnan ku ta marká komo riesgo abou den e lista fechá 6 di ougùstùs 2020, pa loke ta trata transmishon di Covid-19. E pasaheronan aki mester entrega un kopia digital di Passenger Locator Card (PLC) no ménos ku 48 ora prome ku nan vuelo i na entrada na Kòrsou tambe mester entrega e PLC personalmente. Kada pasahero mester demostrá ku e tin un seguro médiko ku ta kubri posibel gastunan médiko. Tin sierto pasaheronan ku no ta obligá di bai den karentena, esakinan ta pasaheronan ku no ta bini di un pais di rísiko haltu kaminda ta plamando e vírus di Corona. Tambe e pasaheronan no mester tin síntoma di Covid-19 i e pasahero no tabata den kontakto último 14 dianan ku niun hende infektá ku e vírus.

Tin otro pasaheronan ku por sigui drenta Kòrsou for di otro paisnan. Ta trata di tripulashon di barkunan, yunan di tera studiando den eksterior pero ta den sirkunstansianan difísil, personanan ku ke bin establesé permanentemente na Kòrsou i ku a ya kaba a Sali for di e registrashon di e pais ku nan ta bandonando, personanan ku ta bini pa entiero òf pa bishita un famia den fase terminal, personal vital di konsuladonan, profeshonalnan médiko ku tin un karta di gobièrnu di Kòrsou i algun otro mas.

Tur loke ta trata vuelonan ku ta atendé karga por sigui drenta na Hato sin niun restrikshon meskos ta konta a vuelonan di emergensia médiko. Mas detaye den edishon di EXTRA.

 

1 COMMENT

  1. Ki sorto di hende ta tin na bestuur di Direktorado di Aviashon ku nan no ta sikiera kapas di skirbi un anunsio klaro i konsiso ku no ta trese e konfushon ku nan a krea respekto na siere si of no di aeropuerto Hato. E ta asina difisil Sr. Leslie pa bisa ku e ta sera pa paisnan di riesgo haltu di Covid19 i no ku ta sera algemeen pa tur vuelonan. Inkreibel asina tanto onbekwaamheid!!! I zeker atrobe e tin un salaris hopi haltu.

LAGA UN KOMENTARIO

Please enter your comment!
Please enter your name here