BALTIMORE/WASHINGTON.- Vários persona a keda herida djaweps na un korant di Annapolis, Maryland. Un testigu a deklará ku ta un hòmber so a basha bala den e sala unda redaktornan di e korant tabata kumpliendo ku nan trabou. Annapolis, Maryland ta keda na 40 km na sur di Baltimore i tambe 50 km na ost di Washington D.C. Annapolis ta parti di e área metropolitano Baltimore-Washington.
Un reportero di The Capital a tweet ku ta un hòmber a los vários tiru heridando bastante hende. Phil Davis, ku ta kubri e área di empresa i polítika pa e korant a tweet ku e hòmber armá a tira dor di e porta di glas i asina alkansá hopi empleado.
No tin nada mas hororoso ku skucha kon hopi hende ta haña bala, miéntras ku abo ta bou di bo büró skondí i pa kolmo skucha kon e hòmber ta bolbe karga su arma ku mas bala skèrpi. E agensia federal di alkohòl, tabako, arma di kandela i eksplosivo a splika ku nan a reakshoná riba reportahe di e tiramentu. Polis di Anne Arundel County pa medio di su bosero Marc Limansky a bisa ku ofisialnan ta listrando den e edifisio. E momentu ei ainda e tiramentu tabata tumando lugá.
Un otro polis a bisa ku nan ta hasiendo tur loke ta na nan alkanse pa saka hendenan bon for di e situashon. Nan ta buskando otro faktornan di peliger manera bòm i mas hende armá. Baltimore Sun Media Group ta doño di The Capital i korantnan, inkluso Maryland Gazette. Funshonarionan di Kas Blanku a indiká ku ya kaba a pone presidente Donald Trump na altura i e bosero di Kas Blanku Lindsay Waters a bisa: ‘nos pensamentu i orashon ta bai pa tur esnan afektá”.
