AMSTERDAM.-Tur atenshon di organisadónan di evento ta fihá pa djaluna awor 2 di ougustus na momentu ku gabinete Rutte anunsiá medida òf desishonnan relashoná ku organisashon di eventonan grandi. Ta asina ku e kompania ulandes ID&T ku a organisá eventonan di entertainment grandi a bai korte ku un demanda kontra di desishonnan di gabinete Rutte pa prohibí organisashon di fiesta i otro eventonan grandi. E huisio sumario mester a tuma lugá djabièrnè awor, pero despues ku a bira konosí ku pa djaluna gabinete lo anunsiá desishonnan nobo ID&T a disidí na wanta tratamentu di e kaso tanten.

Gabinete a pidi e órgano ku ta analisá e situashon i desaroyonan rondó di Corona pa un konseho relashoná ku organisashon di fiesta i eventonan grandi. Manera ta konosí despues di suavisashon di medidanan anteriormente spesialmente hóbennan a sali na gran kantidat bai selebrá den fiestanan i awor Ulanda ta konfrontá gran kantidat di hendenan kontagiá. E krítika riba gobièrnu pa e desishon di suavisashon di medidanan tabata sumamente fuerte, pero di otro banda e organisadónan di fiesta no ke pa stroba e eventonan di tuma lugá.

Di parti di ID&T nan a indiká kaba ku nan ta spera ku djaluna gabinete lo bin ku desishon ku ta permití pa organisá eventonan grandi, naturalmente lo tene kuenta ku medidanan di higiena. Den kaso ku gabinete Rutte bini ku otro desishon e ora ei ID&T lo kontinuá ku tratamentu di e kaso den korte pa obligá gobièrnu pa kita restrikshon pa e eventonan.

 

LAGA UN KOMENTARIO

Please enter your comment!
Please enter your name here