Trahadónan di reskate ta karga kurpa di un víktima kende a muri ora ku un edifisio den konstrukshon na Bangkok no por a soportá e sakudimentu di tera i a basha den otro.
MANDALAY (AFP).- Servisionan di emergensia ayera a sigui buska víktimanan dje temblor di djabièrnè ku a laga por lo ménos 1.700 morto den Biramania i ku a keda sinti te na Bangkok, kaminda 18 persona a fayesé.
Apesar dje yegada gradual di yudansa internashonal, e kantidat di víktima por sigui oumentá den un pais kaminda gran parti dje poblashon ta biba na Sagaing, kaminda tin e plakanan India i euroasiatiko.
For di tempu dje gòlpi di estado di 2021, Birmania a bin ta biba den un konflikto sivil kaminda e sistema di salú a deteriorá.
Djabièrnè mèrdia tabatin un sakudimentu di tera di 7.7, loke a hasi hopi daño. Poko minüt despues tabatin un siguiente temblor ku magnitut di 6.7
E balanse ayera tardi di parti dje hunta militar dje pais a referí na1.700 morto, 3.400 herido i 300 hende di kua no tabata sa nan paradero.
Den e siudat di Mandalay, serka dje episentro, e temblor a provoká derumbe di edifisio- i brùgnan.
Ayera tardi otro sakudimentu di 5.1 a bolbe saka e hendenan riba kaya koriendo i a paralisá pa un ratu e trabounan di reskate.
Agensianan internashonal a atvertí ku Birmania no tin e medio pa enfrentá un desaster dje magnitut aki.
Promé ku e temblor, Nashonnan Uni ya a kalkulá ku sigur un tersera parti dje poblashon den 2025 lo a bin sufri di hamber.
Awor ta bini aserka ku e gran eskases di remedi i fasilidatnan médiko ta debilitando e yudansa, segun Nashonnan Uní, miéntras ku esnan di promé ousilio ta sinti eskases di material di troumatologia, saku di sanger, produktonan anestetiko i remedinan esensial.
Operashonnan di reskate tambe ta mas kompliká pa motibu di dañonan sufrí na hospitalnan i e infrastruktura sanitario, komo tambe karetera i retnan di komunikashon..
Un señora na estado, di kende mester a amputá un pia pa sak’é for di bou di un edifisio ku a basha den otro ,no a sobrebibí e heridanan, apesar di trabou dje dòkternan.
Organisashon Mundial di Salú ayera a entregá kasi tres tòn di remedi pa hospitalnan den Mandalay i Naipyido, e kapital kaminda nan ta tratando míles di herido. E organisashon a hasi un yamada pa hopi lihé por yega na 8 mion dollar pa salba bidanan i prevení epidemianan den próksimo 30 dianan.
China ayera a manda 82 trahadó di promé ousilio ku a komprometé pa pone 13.8 mion dollar na yudansa. Di su parti, Krus Kòrá a hasi un yamada pa rekoudá 100 mion dollar.
Mientras tantu, e gobièrnu di unidat nashonal, ku ta un organisashon opositor, a pidi pa durante di próksimo dos simannan e gruponan stòp di bringa otro i asina fasilitá e trabounan di reskate.
