BRENTWOOD, NEW YORK, AP.- Pa di sinku bia for di sèptèmber, polisnan a deskubrí restunan di un adolesente morto den un komunidat sup urbano na Long Island asotá pa violensia di ‘gang’ nan. E kadaver di Jose Peña Hernández, di 18 aña, ku a disparsé na yüni, a keda deskubrí djadumingu último den un área di mondi di e Sentro Sikiátriko Pilgrim na Brentwood, asina polis di kondado Suffolk a indiká. Lo realisá un outopsia pa determiná kousa di morto, pero polis a bisa ku e kaso ta keda investigá komo unu di asesinato. E deskubrimentu a produsí despues di 4 studiante di e skol sekundario di Brentwood kaminda nan a keda hañá morto. Den último simannan, tur parse di ta víktimanan di violensia di ‘gang’ nan. Polis no a determiná si Peña Hérnandez tabata asistí na e skol ei, pero el a bisa ku e tabata miembro di un ‘gang’ konosí komo MS-13.
E investigadornan a kuminsá deskubrí e kadavernan dia 13 di sèptèmber, ora ku e kurpa di Nisa Micken a keda hañá den un kaya di Brentwood, un dia promé di su 16 kumpleaño. Un dia mas lat, kadaver gòlpiá di su amiga Kayla Cuevas, di 16 aña, a keda deskubrí den un área di mondi den un kas bisiña. E hóbennan tabata inseparabel i tabata disfrutá hunga basketbòl.
Dianan despues, polis a deskubrí e skelètnan di Oscar Acosta di 19 aña, i di Miguel García Morán di 15 aña den un área industrial di e pueblo. Acosta tabata pèrdí fo’i mei i García for di febrüari di e aña aki. Despues di e deskubrimentunan, outoridatnan di skol a atvertí na e studiantenan pa no bisti pañanan ku por ofendé e ‘gang’ nan. No tabatin aresto.
Un funshonario di órden a bisa na The Associated Press ku ta sospechá di e ‘gang’ salvadoreño MS-13.