ORLANDO, FLORIDA, MERKA, AP.- Un turista turko ku tabata riba su luna de miel a muri djaweps dilanti di su kasa durante un ladronisia armá den sentro di distrito turístiko di Orlando.
Osman Darcan a muri despues di a wòrdu tirá vários biaha pa un ladron ku tabata purba hòrta kartera di su kasá, segun e kapitan Angelo Nieves, di ofisina di sheriff di kondado di Orange, den un konferensia di prensa.
E insidente a tuma lugá banda di outo di e pareha, pafó di e hotèl kaminda nan tabata hospedá. E turista di 52 aña tabata purbando di yuda su kasá den e forsegeo ku e ladron, kende a skapa sin e tas, den un outo ku tabata ward’é na banda.
Esaki ta e promé asesinato di un turista den e distrito turístiko di Orlando den historia resien, segun Nieves. E distrito ku ta rondoná e zona internashonal Drive, ta un di e zonanan mas safe di Orlando.
E agentenan a rospondé na rapòrtnan di tiru di dos minüt despues di a risibí yamada di 911 i ta bai asigná mas patruya den distrito den futuro, segun Nieves a indiká.
