MEXICO, AP.- Un husgado federal a ninga protekshon promové pa e abogadonan di Joaquin “El Chapo” Guzmán pa evitá su ekstradishon pa Estádos Unídos, asina outoridatnan mehikano a informá djaweps. E negativismo di hustisia pa protehé e lider di kartel di Sinaloa no ta nifiká ku e lo no keda entregá na Estádos Unídos di manera inmediato, pasobra su abogadonan ainda por rekurí na sentensia ante un tribunal superior. E kaso inkluso lo por yega na Korte Supremo.
Prokuraduria general di repúblika (PGR) a informá den un komunikado ku el a keda notifiká di e fayo i ku lo e keda atento na avanse di e proseso di ekstradishon ku, segun e komishonado di Seguridat Nashonal, Renato Sales a bisa den un entrevista ku Televisa siman pasá, por konkluí na prinsipio di 2017. E abogadonan di El Chapo tin dies dia pa presentá un rekurso di revishon ku lo keda revisá pa un tribunal di kolegio i ta spera ku lo solisitá na Korte Supremo pa atraé e kaso komo “strategia di retraso”, asina un funshonario federal involukrá den e proseso a bisa na AP i tambe a pidi pa e keda bou di anonimato paso e no ta outorisá pa duna deklarashon.
Sinembargo, el a añadí ku e lógika lo ta si Korte rechasá e tema, ya ku “e úniko ku e abogadonan por alegá ta inkonstitushonal di tratado di ekstradishon ku Estádos Unídos i no tin hopi base pa afirmá esaki”.
Ademas, nunka un rekurso di e tipo aki a prosperá den e tribunal superior. Maske ainda por pasa vários luna pa e ekstradishon, e gobièrnu mehikano a plania e operativo di entrega pa ora e desishon di hues yega nan por hasié di forma inmediato.
Segun e funshonario ariba menshoná, e traslado lo ta for di prizòn di máksimo seguridat di Siudat Juárez na frontera ku El Paso, Texas, kaminda awor e ta será, i ku tur kuerpo polisial i di forsanan di seguridat di México lo intervení. E lider di kartel di Sinaloa tin seis kaso habrí den kortenan federal di Estádos Unídos, pero solamente tin trámite di dos órden di ekstradishon: un na Texas, pa e delitonan di krímen organista, narkotráfiko, labamentu di plaka, asesinato i poseshon di armanan ilegal; i otro
Den California, pa tráfiko di kokaina. E protekshon kontra e dos órdennan ei ta hustamente esnan ku a keda ningá djaweps.
Una bes den man di outoridatnan merikano, esakinan lo disidí na kua tribunal lo hiba e kaso.
